ایف این ایف (انسداد منشیات فورس) نے تعلیمی اداروں اور ملک کے مختلف شہروں میں منشیات اسمگلنگ کے خلاف ایک بڑی کارروائی کی ہے۔ اس کریک ڈاؤن کے دوران 9 مختلف کارروائیوں میں 7 ملزمان کو گرفتار کیا گیا اور 1 کروڑ 26 لاکھ روپے سے زائد مالیت کی 111.1 کلو گرام منشیات برآمد کی گئی۔
تعلیمی اداروں میں کی جانے والی کارروائیوں کے دوران، راولپنڈی میں یونیورسٹی کے قریب ایک ملزم کے قبضے سے 40 نشہ آور گولیاں برآمد ہوئیں، جب کہ اٹک میں یونیورسٹی کے قریب ایک اور ملزم سے 500 گرام چرس برآمد کی گئی۔ گرفتار ملزمان نے اعتراف کیا ہے کہ وہ تعلیمی اداروں کے طلباء کو منشیات فروخت کرتے تھے۔
دیگر اہم کارروائیوں میں، کراچی میں کوریئر آفس کے ذریعے آسٹریلیا بھیجے جانے والے پارسل سے لیڈیز کپڑوں میں چھپائی گئی 1.850 کلو آئس برآمد ہوئی، جبکہ ایک اور پارسل میں تکیے کے غلاف میں چھپائی گئی 700 گرام افیون بھی برآمد کی گئی۔ بلوچستان میں گوادر کے غیر آباد علاقے سے 40 کلو چرس ضبط کی گئی۔
کالا باغ روڈ پر میانوالی کے قریب ریلوے پھاٹک سے گاڑی میں چھپائی گئی 30 کلو چرس برآمد کی گئی اور ملزم کو گرفتار کیا گیا۔ سیالکوٹ میں گلوٹیاں موڑ ڈسکہ کے قریب دو موٹر سائیکلوں میں چھپائی گئی 27.6 کلو چرس اور 3.6 کلو افیون برآمد کی گئی، جس کے نتیجے میں 3 ملزمان گرفتار ہوئے۔
پشاور میں بھی کوریئر آفس کے ذریعے لاہور بھیجے جانے والے پارسل سے 4.8 کلو چرس برآمد ہوئی، جبکہ شیخوپورہ انٹرچینج ایم 2 لاہور کے قریب گاڑی سے 1.5 کلو ہیروئین اور 600 گرام آئس برآمد کی گئی۔
گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
