نیشنل سائبر کرائم انویسٹی گیشن ایجنسی (این سی سی آئی اے) کے ایک سب انسپکٹر پر خاتون کو مبینہ طور پر ہراساں کرنے کا الزام سامنے آیا ہے۔
اس معاملے پر گزشتہ روز ہائیکورٹ میں درخواست کی سماعت ہوئی۔ سماعت کے دوران این سی سی آئی اے حکام اور درخواست گزار خاتون کے وکلا پیش ہوئے۔
رات کلب میں ملاقات کا پیغام بھیجنے کا الزام
درخواست گزار کے وکیل کے مطابق این سی سی آئی اے کے سب انسپکٹر چوہدری عمران اللہ نے خاتون کو نوٹس جاری کیا تھا۔
وکیل نے الزام عائد کیا کہ سب انسپکٹر نے پہلے خاتون کو پیغام بھیجا۔ اس میں رات کے وقت کلب میں ملاقات کرنے کا کہا گیا۔
وکیل کے مطابق خاتون کے انکار کے بعد انہیں نوٹس بھیجا گیا۔
این سی سی آئی اے کی محکمانہ کارروائی
سماعت کے دوران این سی سی آئی اے کی جانب سے عدالت میں جواب جمع کرادیا گیا۔
ادارے کے حکام نے بتایا کہ معاملے پر محکمانہ کارروائی شروع کردی گئی ہے۔
بعد ازاں ہائیکورٹ نے این سی سی آئی اے سب انسپکٹر کے خلاف خاتون کو مبینہ طور پر ہراساں کرنے سے متعلق درخواست نمٹا دی۔