پاکستان، ترکیہ اور سعودی عرب کے اعلیٰ حکام کا سہ ملکی اجلاس استنبول میں ہو رہا ہے، جس میں دفاعی اور سکیورٹی تعاون بڑھانے پر اہم مشاورت کی جا رہی ہے۔
اجلاس میں پاکستان کی نمائندگی نائب وزیراعظم و وزیر خارجہ اسحاق ڈار، وزیر دفاع خواجہ آصف اور فیلڈ مارشل سید عاصم منیر کر رہے ہیں۔
ترکیہ کی جانب سے وزیر خارجہ حاقان فیدان، وزیر قومی دفاع یشار گیولر اور چیف آف جنرل اسٹاف جنرل سلچوق بائر اکتار اولو شریک ہیں۔ سعودی وفد میں وزیر خارجہ فیصل بن فرحان، وزیر دفاع خالد بن سلمان اور چیف آف جنرل اسٹاف جنرل فیاض بن حامد الرویلی شامل ہیں۔
دفاعی تعاون پر اہم مشاورت
اجلاس میں تینوں ممالک کے درمیان دفاعی اور سکیورٹی تعاون کو مزید مضبوط بنانے پر غور کیا جا رہا ہے۔ حکام عالمی سلامتی کی صورتحال اور خطے کے بدلتے ہوئے حالات پر بھی تبادلہ خیال کریں گے۔
مذاکرات میں دفاعی صنعت میں مشترکہ پیداوار اور جدید ٹیکنالوجی کے شعبوں میں تعاون بڑھانے کے امکانات بھی زیر غور آئیں گے۔ تینوں ممالک اپنی دفاعی صلاحیتوں کو مزید مضبوط بنانے کے لیے مشترکہ اقدامات پر بھی بات کریں گے۔
پاکستانی حکام کی ترک قیادت سے ملاقاتیں
اجلاس سے قبل ترکیہ کے وزیر قومی دفاع یشار گیولر نے وزیر دفاع خواجہ آصف سے ملاقات کی۔ دونوں رہنماؤں نے دوطرفہ تعلقات اور دفاعی تعاون پر تبادلہ خیال کیا۔
یشار گیولر نے فیلڈ مارشل سید عاصم منیر سے بھی ملاقات کی۔ یہ ملاقات مکہٰ مشترکہ دفاعی معاہدے کے تحت قائم اسٹریٹجک سیاسی و دفاعی کمیٹی کے افتتاحی اجلاس سے قبل ہوئی۔
ملاقاتوں میں پاکستان اور ترکیہ کے درمیان دفاعی شراکت داری کو مزید مستحکم کرنے کے عزم کا اظہار کیا گیا۔
اسحاق ڈار کی حاقان فیدان سے ملاقات
نائب وزیراعظم اسحاق ڈار نے ترکیہ کے وزیر خارجہ حاقان فیدان سے بھی ملاقات کی۔ دونوں رہنماؤں نے دوطرفہ تعلقات اور علاقائی صورتحال پر گفتگو کی۔
اسحاق ڈار نے علاقائی امن و استحکام کے لیے پاکستان کی دیرپا کوششیں جاری رکھنے کے عزم کا اعادہ کیا۔ دونوں جانب سے باہمی تعلقات میں مسلسل پیش رفت پر اطمینان کا اظہار بھی کیا گیا۔
نائب وزیراعظم نے استنبول میں حضرت ابو ایوب انصاریؓ کے مزار پر حاضری دی۔ انہوں نے پاکستان اور اس کے عوام کے امن و خوشحالی اور امت مسلمہ کے اتحاد کے لیے دعا کی۔
شہباز شریف کا مکہ معاہدے پر مؤقف
وزیراعظم شہباز شریف نے کہا ہے کہ پاکستان اور ترکیہ کی اسٹریٹجک شراکت داری مشترکہ خوش حالی اور سکیورٹی کی ضامن ہے۔
ان کے مطابق مکہ معاہدے نے پاکستان اور ترکیہ کے اسٹریٹجک بھائی چارے کی تصدیق کی ہے۔ اس معاہدے نے دونوں ممالک کو سعودی عرب کے ساتھ بھی مضبوط شراکت داری میں جوڑ دیا ہے۔
وزیراعظم نے کہا کہ معاہدہ مشترکہ تحفظ اور دفاعی صلاحیتوں کو مزید مضبوط بنانے کی راہ ہموار کرتا ہے۔
