کراچی میں کراچی ٹریفک پولیس کے مطابق 3 تلوار، کلفٹن پر احتجاجی مظاہرے اور دھرنے کے باعث متعدد اہم شاہراہیں ٹریفک کے لیے بند کر دی گئی ہیں۔ ٹریفک پولیس نے شہریوں سے غیر ضروری سفر سے گریز اور متبادل راستے اختیار کرنے کی اپیل کی ہے۔
پولیس کے مطابق احتجاج کے پُرامن اختتام تک درج ذیل راستے بند رہیں گے:
- میٹروپول تا 3 تلوار، کلفٹن برج کے ذریعے۔
- کے پی ٹی انڈر پاس تا 3 تلوار۔
- بوٹ بیسن تا 3 تلوار۔
- ریس کورس سگنل تا 3 تلوار۔
- باتھ آئی لینڈ تا 3 تلوار۔
متبادل راستے
ایئرپورٹ سے شہر کی جانب آنے والی ٹریفک CSD کی طرف بائیں مڑ کر یا JPMC کی جانب بائیں مڑتے ہوئے اپنی منزل کی طرف جا سکے گی۔
بوٹ بیسن سے آنے والی ٹریفک سیدھا پنجاب کالونی کی جانب جائے گی اور وہاں سے اپنی منزل کی طرف روانہ ہوگی۔
2 تلوار سے آنے والی ٹریفک زمزمہ اسٹریٹ کی جانب جائے گی اور وہاں سے آگے اپنی منزل کی طرف جا سکے گی۔
عبداللہ ہارون روڈ اور آواری سگنل سے آنے والی ٹریفک فاطمہ جناح روڈ اور کینٹ اسٹیشن کی جانب جائے گی، جہاں سے چوہدری خلیق الزماں روڈ کی طرف روانہ ہوگی۔
چوہدری خلیق الزماں روڈ سے ضیاء الدین روڈ کی جانب جانے والی ٹریفک کو 3 تلوار کی طرف مڑنے کی اجازت نہیں ہوگی۔
کراچی ٹریفک پولیس نے شہریوں کو ہدایت کی ہے کہ وہ غیر ضروری طور پر بند راستوں کی جانب جانے سے گریز کریں اور سفر سے پہلے متبادل راستہ اختیار کریں۔ شہریوں سے ٹریفک پولیس اور قانون نافذ کرنے والے اداروں کے اہلکاروں سے مکمل تعاون کی بھی اپیل کی گئی ہے۔
پولیس کے مطابق شہری غیر ضروری سفر اور اضافی ایندھن کے استعمال سے بچنے کے لیے روانگی سے قبل اپنے راستے کی منصوبہ بندی کریں۔ موقع کی صورتحال کے مطابق ٹریفک پولیس ٹریفک پلان میں ضروری تبدیلیاں بھی کر سکتی ہے۔
کراچی ٹریفک پولیس نے کہا ہے کہ یہ انتظامات شہریوں کی سہولت، عوامی مفاد اور ٹریفک کی روانی برقرار رکھنے کے لیے کیے گئے ہیں۔
ٹریفک سے متعلق معاونت اور تازہ ترین معلومات کے لیے شہری ٹریفک پولیس ہیلپ لائن 1915 سے رابطہ کر سکتے ہیں اور ایف ایم 88.6 سن سکتے ہیں۔
