کراچی میں این آئی سی وی ڈی گورننگ باڈی کا 85واں اجلاس وزیراعلیٰ سندھ سید مراد علی شاہ کی زیر صدارت وزیراعلیٰ ہاؤس میں ہوا۔ اجلاس میں ایڈوانسڈ ہارٹ فیلئر پروگرام کے قیام اور مستقبل میں ہارٹ ٹرانسپلانٹ پروگرام شروع کرنے کی تیاری کی اصولی منظوری دی گئی۔
اجلاس میں وزیر صحت ڈاکٹر عذرا فضل پیچوہو، میئر کراچی مرتضیٰ وہاب، ارکان سندھ اسمبلی رخسانہ پروین اور سعدیہ جاوید، پرنسپل سیکریٹری آغا واصف، سیکریٹری صحت طاہر سانگی، سیکریٹری خزانہ اصغر میمن، ایگزیکٹو ڈائریکٹر این آئی سی وی ڈی پروفیسر طاہر صغیر، پیشنٹس ایڈ فاؤنڈیشن کے بانی مشتاق چھاپرا، پروفیسر شاہد سمیع اور گورننگ باڈی کے دیگر ارکان شریک ہوئے۔
اجلاس کو بریفنگ میں بتایا گیا کہ ایڈوانسڈ ہارٹ فیلئر پروگرام میں لیفٹ وینٹریکولر اسسٹ ڈیوائس (LVAD) ٹیکنالوجی استعمال کی جائے گی۔ وزیراعلیٰ سندھ نے اسے جدید امراض قلب کے علاج میں اہم پیش رفت قرار دیا۔
سید مراد علی شاہ نے کہا کہ سندھ حکومت مستحق مریضوں کو مفت اور معیاری دل کا علاج فراہم کرنے کے لیے پرعزم ہے۔ انہوں نے کہا کہ این آئی سی وی ڈی سندھ کا مثالی طبی ادارہ اور قومی اثاثہ ہے، جہاں زندگی بچانے والا علاج مستحق مریضوں کو مفت فراہم ہوتا رہے گا۔
وزیراعلیٰ نے بڑھتی ہوئی آبادی اور طبی ضروریات کے پیش نظر خصوصی کارڈیک سروسز میں توسیع پر زور دیا۔ انہوں نے جدید ٹیکنالوجی اور انسانی وسائل کو مضبوط بنانے کی ہدایت کرتے ہوئے کہا کہ طبی خدمات کا معیار مزید بہتر بنایا جائے۔
این آئی سی وی ڈی کی کارکردگی
اجلاس میں بتایا گیا کہ این آئی سی وی ڈی نے 2025 میں ریکارڈ تعداد میں خصوصی طبی خدمات فراہم کیں۔ ادارے میں گزشتہ سال 9,279 پرائمری PCI پروسیجرز کیے گئے، جبکہ بچوں کی 3,069 کیتھیٹرائزیشن اور انٹروینشنز بھی ہوئیں۔
بریفنگ کے مطابق 2025 میں این آئی سی وی ڈی نے 1,400 سے زائد کارڈیک سرجریز کیں، جبکہ 296,731 ایمرجنسی کنسلٹیشنز اور 443,610 او پی ڈی مشاورت فراہم کی گئی۔ اس دوران 18,875 انجیوگرافیز اور 88,165 ایکوکاریڈیوگرافی کے معائنے بھی کیے گئے۔
اجلاس کو بتایا گیا کہ 2019 سے 2025 تک سندھ کے این آئی سی وی ڈی میں دیگر صوبوں سے آنے والے 13 لاکھ 20 ہزار سے زائد مریضوں کا علاج ہوا۔ بلوچستان، پنجاب، خیبرپختونخوا، آزاد کشمیر اور گلگت بلتستان کے مریض بھی ادارے کی مفت طبی سہولیات سے مستفید ہوئے۔
وزیراعلیٰ سندھ نے کہا کہ این آئی سی وی ڈی کی خدمات اس ادارے کی قومی اہمیت کا واضح ثبوت ہیں۔ انہوں نے انتظامیہ کو مریضوں کے علاج میں بین الاقوامی معیار برقرار رکھنے کی ہدایت کی۔
ملازمین اور انتظامی امور
گورننگ باڈی نے این آئی سی وی ڈی ملازمین کی ترقی اور اپ گریڈیشن کے عمل کی اصولی منظوری بھی دی۔ اجلاس میں نظرثانی شدہ سروس رولز کی حتمی منظوری تک 2016 کے قواعد کے تحت ترقیوں کا عمل جاری رکھنے کی اجازت دی گئی۔
وزیراعلیٰ نے کہا کہ ڈاکٹرز، نرسز، فیکلٹی اور دیگر ملازمین کی ترقی ادارے کی کارکردگی بہتر بنانے کے لیے ضروری ہے۔ انہوں نے نظرثانی شدہ قواعد محکمہ قانون سے ویٹ کرانے کی ہدایت کی۔
اجلاس نے چیف آپریٹنگ آفیسر اور چیف فنانشل آفیسر کی دو سالہ کنٹریکٹ پر بھرتی کی بھی منظوری دی۔ وزیراعلیٰ نے کہا کہ این آئی سی وی ڈی کے بڑھتے ہوئے آپریشنز کے لیے مضبوط انتظامی اور مالیاتی نظام ضروری ہے۔
بین الاقوامی ماہر امراض قلب کی تقرری
اجلاس میں معروف امریکی ماہر امراض قلب پروفیسر جاوید سلیمان کی این آئی سی وی ڈی میں رضاکارانہ تقرری کی منظوری دی گئی۔ وہ ادارے میں پروفیسر آف کارڈیالوجی اور میڈیکل ڈائریکٹر کی ذمہ داریاں انجام دیں گے۔
بریفنگ میں بتایا گیا کہ پروفیسر جاوید سلیمان کی تقرری سے این آئی سی وی ڈی پر کوئی مالی بوجھ نہیں پڑے گا۔ وزیراعلیٰ سندھ نے بیرون ملک مقیم پاکستانی طبی ماہرین کی خدمات کو قابل تحسین قرار دیا اور کہا کہ ان کی مہارت سے سندھ میں طبی خدمات اور میڈیکل تعلیم مزید مضبوط ہوگی۔
بچوں کے امراض قلب کی سہولیات میں توسیع
گورننگ باڈی نے این آئی سی وی ڈی کے پیڈیاٹرک کارڈیالوجی ڈیپارٹمنٹ میں میڈیکل آفیسر گریڈ 17 کی نئی آسامی کی بھی منظوری دی۔ وزیراعلیٰ نے بچوں کے امراض قلب کی خدمات مزید مضبوط بنانے اور پیدائشی و لاحق امراض قلب میں مبتلا بچوں کا علاج بلا تعطل جاری رکھنے کی ہدایت کی۔
اجلاس کو بتایا گیا کہ این آئی سی وی ڈی میں 300 بستروں پر مشتمل علیحدہ پیڈیاٹرک کارڈیالوجی یونٹ تعمیر کیا جا رہا ہے۔ سات منزلہ یونٹ میں پانچ آپریشن تھیٹرز، چار کیتھیٹرائزیشن لیبارٹریز، ہائبرڈ لیبارٹری اور جدید تشخیصی سہولیات شامل ہوں گی۔
اس کے علاوہ این آئی سی وی ڈی میں 100 بستروں پر مشتمل جدید کارڈیک ایمرجنسی سینٹر اور 59 ہزار مربع فٹ رقبے پر نیا آؤٹ پیشنٹ ڈیپارٹمنٹ بھی تعمیر کیا جا رہا ہے۔
وزیراعلیٰ سندھ نے این آئی سی وی ڈی کے تمام جاری توسیعی منصوبے بروقت مکمل کرنے کی ہدایت کی۔ انہوں نے کہا کہ سندھ حکومت ایسے منصوبوں کی بھرپور حمایت جاری رکھے گی جو عوام کی معیاری طبی سہولیات تک رسائی بڑھاتے ہیں۔
سید مراد علی شاہ نے کہا کہ صحت کا شعبہ سندھ حکومت کی اولین ترجیحات میں شامل ہے اور این آئی سی وی ڈی کو پاکستان بھر کے مریضوں کے لیے مفت اور عالمی معیار کے علاج کا مرکزِ امتیاز بنایا گیا ہے۔
