ایبٹ آباد (تشکر نیوز) ڈی جی آئی ایس پی آر لیفٹیننٹ جنرل احمد شریف چوہدری نے ایبٹ آباد میں مختلف اسکولوں، کالجوں، اور یونیورسٹیوں کے اساتذہ اور طلبہ و طالبات کے ساتھ خصوصی نشست کا انعقاد کیا، جس میں 750 سے زائد افراد شریک ہوئے۔
اس نشست میں شرکاء نے ملک کو درپیش مسائل پر کھل کر سوالات کیے، جس کا ڈی جی آئی ایس پی آر نے تفصیلی جوابات دے کر حقائق واضح کیے۔ طلبہ و طالبات نے اس موقع پر کہا کہ یہ نشست نہایت مفید رہی، جس سے ان کے شکوک و شبہات دور ہوئے اور حقیقت تک رسائی ممکن ہوئی۔
ایک طالب علم نے اس موقع پر اپنے خیالات کا اظہار کرتے ہوئے کہا، "ڈائریکٹر جنرل آئی ایس پی آر کے ساتھ نشست خوش آئند ہے، اور یہ ملک دشمن پروپیگنڈے کے تدارک کے حوالے سے کافی سودمند ثابت ہوئی۔” ایک اور طالب علم نے کہا، "اس نشست سے ہمیں یہ سیکھنے کو ملا کہ سوشل میڈیا پر پھیلنے والے پروپیگنڈے کا مقابلہ کرنے کے لیے حقائق کی تلاش ضروری ہے۔”
