تشکر نیوز: عزیز آباد پولیس نے گزشتہ شب مقابلے کے بعد تین ملزمان کو گرفتار کر لیا، جن میں سے ایک زخمی حالت میں تھا۔ ایس ایس پی ڈسٹرکٹ سینٹرل کے مطابق، گرفتار ملزمان کی شناخت عرفان عرف مومو، اختر عرف جادوگر، اور افضل کے ناموں سے ہوئی ہے۔
یہ ملزمان عادی جرائم پیشہ ہیں اور اس سے قبل بھی ڈسٹرکٹ ویسٹ کے مختلف تھانوں، بشمول اورنگی ٹاؤن، پیر آباد، اور اقبال مارکیٹ، میں اسلحہ اور منشیات کے مقدمات میں گرفتار ہو چکے ہیں۔
ملزمان کے وارداتوں کی سی سی ٹی وی فوٹیج بھی حاصل کر لی گئی ہے، جس میں انہیں واردات کرتے ہوئے دیکھا جا سکتا ہے۔ ایک فوٹیج میں ملزمان کو نارتھ ناظم آباد کی حدود میں ایک 125 موٹر سائیکل چھینتے ہوئے دکھایا گیا ہے، جس کے بعد وہ اپنی موٹر سائیکل بھی چھوڑ گئے تھے۔ مزید برآں، ملزمان کی اسٹیل کی دکان پر واردات کی سی سی ٹی وی فوٹیج بھی حاصل کی گئی ہے۔
گرفتار ملزمان کے خلاف ضابطے کی کارروائی مکمل کر لی گئی ہے، اور دیگر وارداتوں میں ان کی گرفتاری اور انٹیروگیشن کا عمل جاری ہے۔