مرکزی مسلم لیگ کے زیر اہتمام کراچی میں انٹراپارٹی انتخابات کے پانچویں مرحلے کا انعقاد بھرپور انداز میں جاری ہے، جہاں شہر کی 40 سے زائد یونین کونسلز میں کارکنان اپنی قیادت کے انتخاب کے عمل میں سرگرم حصہ لے رہے ہیں۔
کراچی ایسٹ میں اسٹریٹ کرائم کے خلاف کارروائی، گلشنِ اقبال پولیس نے دو ملزمان گرفتار کر لیے
پارٹی قیادت کے مطابق یہ انتخابی عمل نچلی سطح تک جمہوری اقدار کے فروغ کی عکاسی کرتا ہے، جس کے ذریعے کارکنان کو براہ راست اپنی قیادت منتخب کرنے کا موقع فراہم کیا جا رہا ہے۔ اس موقع پر سندھ کے صدر فیصل ندیم اور رہنما احمد ندیم اعوان نے مختلف انتخابی کیمپس کا دورہ کیا اور انتخابی سرگرمیوں کا جائزہ لیا۔
فیصل ندیم کا کہنا تھا کہ مرکزی مسلم لیگ گراس روٹ سطح پر جمہوریت کے فروغ پر یقین رکھتی ہے اور کارکنان کو بااختیار بنانا پارٹی کی اولین ترجیح ہے۔ انہوں نے کہا کہ دیگر سیاسی جماعتوں میں انٹراپارٹی انتخابات اکثر رسمی کارروائی بن کر رہ جاتے ہیں، تاہم ان کی جماعت شفاف اور منظم انداز میں انتخابی عمل کو یقینی بنا رہی ہے۔
احمد ندیم اعوان نے اس موقع پر کہا کہ پارٹی کارکنان کو فیصلہ سازی میں شامل کرنا ہی مضبوط سیاسی نظام کی بنیاد ہے، اور یہی عمل مستقبل میں بہتر قیادت کے انتخاب میں مددگار ثابت ہوگا۔ انہوں نے مزید کہا کہ مرکزی مسلم لیگ آئندہ بلدیاتی اور کنٹونمنٹ انتخابات میں بھرپور حصہ لے گی اور عوامی خدمت کے ایجنڈے کو آگے بڑھائے گی۔
سیاسی مبصرین کے مطابق انٹراپارٹی انتخابات کا یہ عمل نہ صرف جماعتی سطح پر جمہوری روایات کو مضبوط بنائے گا بلکہ مجموعی سیاسی نظام میں بھی مثبت تبدیلی کا باعث بن سکتا ہے۔