مرکزی مسلم لیگ نے وزیراعلیٰ پنجاب مریم نواز کو قانونی نوٹس بھجوا دیا ہے۔
پارٹی نے یہ نوٹس مبینہ بے بنیاد اور ہتک آمیز الزامات عائد کرنے پر جاری کیا۔ نوٹس میں مریم نواز سے 7 روز کے اندر معافی مانگنے کا مطالبہ کیا گیا ہے۔
سوشل میڈیا پوسٹس حذف کرنے کا مطالبہ
قانونی نوٹس کے مطابق مریم نواز ایکس سمیت سوشل میڈیا سے متعلقہ پوسٹس حذف کریں۔
نوٹس میں تحریری یقین دہانی کا بھی مطالبہ کیا گیا ہے۔ اس کے مطابق مریم نواز آئندہ ایسے الزامات نہ دہرائیں گی، نہ شائع کریں گی اور نہ کسی دوسرے ذریعے سے پھیلائیں گی۔
مرکزی مسلم لیگ نے خبردار کیا ہے کہ 7 روز میں معافی نہ مانگنے پر قانونی کارروائی کی جائے گی۔
مریم نواز پر کیا الزامات لگانے کا دعویٰ کیا گیا؟
قانونی نوٹس مرکزی مسلم لیگ کے صدر خالد مسعود سندھو کی ہدایات پر جاری کیا گیا۔
یہ نوٹس ایڈووکیٹ محمد عامر حبیب نے بھجوایا۔ نوٹس میں کہا گیا ہے کہ مرکزی مسلم لیگ الیکشن کمیشن آف پاکستان میں رجسٹرڈ سیاسی جماعت ہے۔
پارٹی کے مطابق مریم نواز نے اپنے ذاتی ایکس اکاؤنٹ اور الیکٹرانک میڈیا پر اسے ’غیر قانونی پارٹی‘ اور ’دہشت گرد پارٹی‘ قرار دیا۔
ضمنی انتخاب میں دوسری بڑی جماعت ہونے کا دعویٰ
قانونی نوٹس میں کہا گیا ہے کہ مرکزی مسلم لیگ نے 2024 کے عام انتخابات میں انتخابی نشان ’کرسی‘ پر حصہ لیا تھا۔
پارٹی کے مطابق 8 نومبر 2026 کو حلقہ این اے 77 گوجرانوالہ کے ضمنی انتخاب میں وہ دوسری بڑی جماعت کے طور پر سامنے آئی۔
مرکزی مسلم لیگ نے قانونی نوٹس کے ذریعے مریم نواز سے معافی اور آئندہ ایسے الزامات سے گریز کرنے کا مطالبہ کیا ہے۔