رحیم یار خان (اسٹاف رپورٹر): کچہ کے بدنام زمانہ ڈاکو عبدالستار لولائی چار ساتھیوں کے ہمراہ پولیس کے سامنے سرنڈر کر گئے۔ ڈی پی او صادق آباد عرفان علی سموں نے بتایا کہ سرنڈر ڈاکو پر حکومت پنجاب کی جانب سے 25 لاکھ روپے انعام مقرر تھا۔
ڈی پی او نے کہا کہ عبدالستار لولائی اور اس کے ساتھیوں پر اغواء برائے تاوان اور دیگر سنگین جرائم کے متعدد مقدمات درج ہیں۔ انہوں نے واضح کیا کہ سرنڈر ہونے والے ڈاکوؤں کے ساتھ قانون کے مطابق سلوک کیا جائے گا اور جو بھی بچے کھچے عناصر خود پیش ہوں گے، انہیں بھی مناسب قانونی کارروائی کا سامنا کرنا پڑے گا۔
عرفان علی سموں نے کہا کہ کچہ کے چپہ چپہ کو ڈاکوؤں سے کلیئر کرنے کے لیے پولیس کی کارروائیاں جاری رہیں گی اور مستقل امن قائم کر کے علاقے کو محفوظ بنایا جائے گا۔ انہوں نے شہریوں سے اپیل کی کہ سرنڈر ہونے والے مجرموں کو قانون کے مطابق پیش آئیں اور تعاون کریں۔
ڈی پی او نے مزید کہا کہ کچہ میں مستقل امن کے قیام کے لیے تمام وسائل بروئے کار لائے جائیں گے تاکہ عوام بلا خوف و خطر زندگی گزار سکیں۔