اسلام آباد کی سیشن عدالت نے وزیراعلیٰ خیبرپختونخوا علی امین گنڈاپور کے خلاف شراب و اسلحہ برآمدگی کیس میں وارنٹ گرفتاری جاری کر دیے۔ عدالت نے وکیل کی جانب سے وارنٹ معطل کرنے کی استدعا مسترد کر دی۔
پنجاب حکومت کا بڑا قدم: سیلاب متاثرین کی امداد کے لیے ایئر لفٹ ڈرون سروس متعارف
جوڈیشل مجسٹریٹ مبشر حسن چشتی نے یہ حکم اس وقت دیا جب علی امین گنڈاپور کی جانب سے کوئی نمائندہ عدالت میں پیش نہ ہوا۔ عدالت نے پولیس کو ہدایت کی کہ ملزم کو گرفتار کر کے 17 ستمبر کو پیش کیا جائے۔ یہ مقدمہ تھانہ بہارہ کہو میں درج ہے۔
عدالتی حکم کے بعد گنڈاپور کے وکیل راجا ظہورالحسن پیش ہوئے اور استدعا کی کہ وارنٹ گرفتاری معطل کر دیے جائیں۔ تاہم جج نے ریمارکس دیے کہ اگر ملزم پیش ہو جائے تو وارنٹ منسوخ ہو سکتے ہیں۔ جج نے مزید کہا کہ اگر کوئی جونیئر وکیل بھی تاریخ لے لیتا تو کیس مؤخر کر دیا جاتا۔
یاد رہے کہ 19 جولائی 2025 کو بھی ڈسٹرکٹ اینڈ سیشن کورٹس اسلام آباد نے اسی کیس میں علی امین گنڈاپور کے ناقابل ضمانت وارنٹ گرفتاری جاری کیے تھے اور حاضری سے استثنیٰ کی درخواست مسترد کر دی تھی۔