تشکر نیوز: آئی جی سندھ غلام نبی میمن نے وفاق ایوان ہائے تجارت و صنعت (FPCCI) کا خصوصی دورہ کیا، جہاں انہوں نے تاجر برادری کی جانب سے منعقدہ تقریب میں شرکت کی۔ اس موقع پر ایف پی سی سی آئی کے صدر عاطف اکرام، سینئر نائب صدر خالد نواب، عاقب مانگو، ذاکر فیاض، سابق سی پی ایل سی چیف احمد چنائے اور صوبے کی مختلف چیمبرز کے نمائندگان بھی موجود تھے۔
کراچی کی ترقی کے لیے 3 بلین ڈالرز درکار، سالانہ 1000 بلین روپے خرچ ہونے چاہئیں: وزیراعلیٰ سندھ
اس تقریب کا مقصد تاجر برادری اور پولیس کے درمیان مضبوط اور پائیدار تعلقات کا قیام تھا۔ مقررین نے بتایا کہ ایف پی سی سی آئی نے صوبے کے ہر شہر میں اپنے ایک فوکل پرسن کی تقرری کی ہے۔ صدر ایف پی سی سی آئی نے آئی جی سندھ کے اس اقدام کو سراہتے ہوئے کہا کہ پولیس کے فوکل پرسنز کی تقرری ایک بہترین اقدام ہے۔
مقررین نے یہ بھی ذکر کیا کہ پولیس کے اقدامات کی بدولت امن و امان کی صورتحال میں بہتری آئی ہے اور اسٹریٹ کرائم میں نمایاں کمی دیکھنے میں آئی ہے۔ درپیش سیکیورٹی چیلنجز کے بارے میں بات کرتے ہوئے، مقررین نے بھتہ خوری اور اغواء جیسے واقعات کے اثرات کو مدنظر رکھتے ہوئے مزید خصوصی توجہ کی ضرورت پر زور دیا۔ انہوں نے اس بات کا بھی اعتراف کیا کہ پولیس نے مشکل ترین حالات میں بہترین کام کیا ہے، جس سے شہر کی حقیقی معیشت کو مستحکم کرنے میں مدد ملی ہے۔