پاکستان سپر لیگ (پی ایس ایل) کے دسویں ایڈیشن کے پہلے ایلیمینیٹر میں لاہور قلندرز نے شاندار کارکردگی کا مظاہرہ کرتے ہوئے کراچی کنگز کو 6 وکٹوں سے شکست دے کر ٹورنامنٹ سے باہر کر دیا۔ لاہور کے قذافی اسٹیڈیم میں کھیلے گئے اس میچ میں کراچی کنگز نے پہلے بیٹنگ کرتے ہوئے 190 رنز کا ہدف دیا، جو لاہور نے 18.4 اوورز میں 4 وکٹوں کے نقصان پر حاصل کر لیا۔
لاہور کی فتح میں فخر زمان، عبداللہ شفیق اور راجا پکسے کی برق رفتار اننگز کلیدی رہی۔ فخر نے 47، عبداللہ نے 65 اور راجا پکسے نے ناقابلِ شکست 23 رنز بنائے۔
کراچی کنگز کی بیٹنگ لائن کپتان ڈیوڈ وارنر کے سوا کچھ خاص نہ کر سکی، انہوں نے 75 رنز کی عمدہ اننگز کھیلی۔ دیگر بیٹرز خاطر خواہ کارکردگی نہ دکھا سکے۔ لاہور کے حارث رؤف نے 3 جبکہ شاہین شاہ اور دیگر بولرز نے بھی اہم وکٹیں حاصل کیں۔
اس جیت کے ساتھ لاہور قلندرز پی ایس ایل 10 کے دوسرے کوالیفائر میں داخل ہوگئی ہے، جہاں ان کا مقابلہ اسلام آباد یونائیٹڈ سے ہوگا۔ جیتنے والی ٹیم فائنل میں کوئٹہ گلیڈی ایٹرز سے ٹکرائے گی، جو پہلے ہی دفاعی چیمپئن اسلام آباد کو شکست دے کر فائنل میں پہنچ چکی ہے۔
یاد رہے کہ کراچی کنگز اور لاہور کے درمیان ہونے والا یہ میچ "ڈو اور ڈائی” تھا، جس میں شکست خوردہ ٹیم کا ٹورنامنٹ سے اخراج یقینی تھا۔ لاہور نے نہ صرف میچ جیتا بلکہ بھرپور انداز میں اپنی فائنل کی امیدیں بھی برقرار رکھیں۔