اسلام آباد میں یادگارِ فتح کا افتتاح 79ویں یومِ آزادی کے موقع پر ایک پروقار تقریب میں کیا گیا۔ تقریب میں ملک کی اعلیٰ سول اور عسکری قیادت نے شرکت کی۔
صدر مملکت آصف علی زرداری اور وزیراعظم شہباز شریف نے بطور مہمانانِ خصوصی تقریب میں شرکت کی۔ چیف آف ڈیفنس فورسز و چیف آف آرمی اسٹاف فیلڈ مارشل سید عاصم منیر بھی تقریب میں موجود تھے۔
چیف آف ایئر اسٹاف ایئر چیف مارشل ظہیر احمد بابر سدھو اور چیف آف نیول اسٹاف ایڈمرل نوید اشرف نے بھی تقریب میں شرکت کی۔
تقریب کا آغاز ملٹری بینڈ کی جانب سے قومی ترانے کی دھن پیش کرنے سے ہوا۔ اس موقع پر ملک کے شہدا کو خراجِ عقیدت پیش کیا گیا۔
یادگارِ فتح کی تعمیر کا مقصد
یادگارِ فتح شہدا کی قربانیوں کو خراجِ عقیدت پیش کرنے کے لیے تعمیر کی گئی ہے۔ یہ مئی میں بھارت کے ساتھ ہونے والے مختصر فوجی تنازع میں پاکستان کی فتح کی یاد بھی دلاتی ہے۔
تقریب میں ’داستانِ عشقِ وطن: معرکۂ حق‘ کے عنوان سے لائٹ اینڈ ساؤنڈ شو پیش کیا گیا۔ پروجیکشن میپنگ کے ذریعے یادگار پر مختلف مناظر دکھائے گئے۔
یادگار کی تعمیر کے سفر پر ایک دستاویزی فلم بھی پیش کی گئی۔ فلم میں آٹھ ماہ کے دوران یادگار کی تعمیر کے مختلف مراحل دکھائے گئے۔
پانچ محرابیں اور قومی ستون
دستاویزی فلم کے مطابق یادگار میں پانچ محرابیں تعمیر کی گئی ہیں۔ یہ محرابیں اسلام کے پانچ ارکان کی علامت ہیں۔
محرابیں پاکستان کے پانچ اہم ستونوں کی بھی نمائندگی کرتی ہیں۔ ان میں حکومت، عسکری قوت، میڈیا، عوام اور قومی نظریہ شامل ہیں۔
یادگار کے ڈیزائن میں بری فوج، پاک فضائیہ اور پاک بحریہ کی نمائندگی بھی شامل ہے۔ اس کے علاوہ سائبر دفاع اور خلائی جنگ کے پہلو بھی ڈیزائن کا حصہ ہیں۔
فضائی مظاہرہ اور آتش بازی
افتتاحی تقریب میں پاک فضائیہ کے لڑاکا طیاروں نے شاندار فضائی مظاہرہ کیا۔ طیاروں نے رات کے آسمان پر فلیئرز بھی چھوڑے۔
تقریب کے اختتام پر صدر آصف علی زرداری، وزیراعظم شہباز شریف اور فیلڈ مارشل عاصم منیر نے پرچم کشائی کی۔
اس موقع پر شاندار آتش بازی بھی ہوئی۔ پس منظر میں قومی ترانے کی دھن بجتی رہی۔
شہدا کے اہل خانہ اور غازیوں سے ملاقات
تقریب کے دوران وزیراعظم شہباز شریف، فیلڈ مارشل عاصم منیر اور دیگر اعلیٰ سول و عسکری قیادت نے شہدا کے اہل خانہ اور غازیوں سے ملاقات کی۔
قیادت نے شہدا کی قربانیوں اور غازیوں کی خدمات کو خراجِ تحسین پیش کیا۔
دریں اثنا تقریب کے دوران فیلڈ مارشل سید عاصم منیر کی خواتین سے ملاقات کی ایک ویڈیو سوشل میڈیا پر وائرل ہوگئی۔ ویڈیو میں انہیں خواتین کے سروں پر دستِ شفقت رکھتے ہوئے دیکھا جا سکتا ہے۔
