ضلع کیماڑی میں اینٹی اسٹریٹ کرائم سیل نے خفیہ اطلاع پر کارروائی کرتے ہوئے انتہائی مطلوب منشیات ڈیلر شہزاد خان کو دو ساتھیوں سمیت نورس چورنگی سائیٹ ایریا سے گرفتار کرلیا۔ ایس ایس پی کیماڑی کیپٹن (ر) فیضان علی کے مطابق ملزمان کے قبضے سے بھاری مقدار میں منشیات اور اسلحہ برآمد کیا گیا ہے۔
سندھ میں خواتین کے لیے الیکٹرک اسکوٹی متعارف کروانے کی تیاریاں، چینی سرمایہ کاروں کی دلچسپی
گرفتاری کی تفصیلات:
گرفتار ملزمان کی شناخت شہزاد خان، شاہ فہد اور یاسین کے ناموں سے ہوئی۔ پولیس کے مطابق شہزاد خان، جو کیماڑی کے علاقے مسان چوک میں منشیات کا نیٹ ورک چلا رہا تھا، پولیس کو طویل عرصے سے مطلوب تھا۔ یہ نیٹ ورک ڈیفنس، کلفٹن اور دیگر پوش علاقوں میں منشیات کی آن کال ڈلیوری فراہم کرتا تھا۔
ملزمان کے قبضے سے تین پستول، ڈیڑھ کلو آئس اور پانچ کلو چرس برآمد ہوئی۔ مزید تحقیقات میں معلوم ہوا کہ شہزاد خان کے خلاف تھانہ جیکسن اور بوٹ بیسن میں 8 سے زائد مقدمات درج ہیں، جن میں سے وہ اشتہاری اور مفرور تھا۔
کارروائی اور مقدمات:
گرفتاری کی کارروائی اینٹی اسٹریٹ کرائم سیل کے انچارج سب انسپکٹر راجہ خالد کی سربراہی میں انجام دی گئی۔ گرفتار ملزمان کے خلاف تھانہ سائیٹ اے میں مقدمات درج کرلیے گئے ہیں اور مزید تفتیش جاری ہے۔
