ڈپٹی انسپیکٹر جنرل ٹریفک پولیس کراچی سید پیر محمد شاہ نے اسکاؤٹ آڈیٹوریم ساؤتھ کراچی میں ٹریفک پولیس افسران و اہلکاروں سے خطاب کیا، جس میں انہوں نے ٹریفک مینجمنٹ کے حوالے سے اہم نکات پر روشنی ڈالی اور شہریوں کی خدمت میں نئی راہوں کا آغاز کرنے کی بات کی۔ اس موقع پر تمام ایس ایس پی صاحبان، ڈی ایس پی صاحبان اور سیکشن آفیسرز نے شرکت کی۔
ویسٹ پولیس نے اسٹریٹ کرائمز میں ملوث تین رکنی ڈکیت گینگ کو گرفتار کرلیا
انہوں نے خطاب میں کہا کہ "ٹریفک منیجمنٹ کا مسئلہ شہر میں ایک اہم چیلنج ہے اور اس کی بہتری ہماری اولین ترجیح ہے۔”
سید پیر محمد شاہ نے اپنے خطاب میں افسران و اہلکاروں کو ایمانداری اور اخلاقی معیار پر عمل کرنے کی ہدایت دیتے ہوئے کہا کہ انفورسمنٹ کو بڑھایا جائے اور ڈمپر اور ہیوی ٹریفک کی ٹائمنگ پر سختی سے عمل درآمد کرایا جائے۔ مقررہ ٹائمنگ رات 10 بجے سے صبح 6 بجے تک ہے۔
انہوں نے مزید کہا کہ "غیر قانونی واٹر ٹینکرز، رنگین شیشے، فینسی نمبر پلیٹس، غیر مجاز پولیس لائٹس اور ہوٹرز والی گاڑیوں کے خلاف سخت کارروائیاں کی جائیں گی۔”
موٹر سائیکل سواروں کو بغیر ہیلمٹ کے چلنے کی اجازت نہ دینے اور ڈرائیونگ لائسنس کے بغیر گاڑی چلانے والوں کے خلاف جرمانہ عائد کرنے کی ہدایت بھی کی گئی۔ بغیر لائسنس کے کمرشل گاڑیوں کے خلاف ایف آئی آر درج کرنے کی ہدایت دی گئی۔
انہوں نے غیر قانونی تجاوزات کے خاتمے اور ایکسٹرا سیٹر رکشہ مافیا کے خلاف بھرپور کارروائی کرنے کی بات بھی کی۔ کم عمر بچوں کے ڈرائیونگ کرنے والے رکشوں اور گاڑیوں کے خلاف سخت اقدامات کرنے کا اعلان کیا۔
"ڈبل پارکنگ، ون وے کی خلاف ورزیوں اور بغیر فٹنس کے ہیوی گاڑیوں کے خلاف کارروائیاں کی جائیں گی۔” انہوں نے مزید کہا کہ پیٹرولنگ کارز میں تعینات افسران کو عوام میں روڈ سیفٹی کے متعلق آگاہی فراہم کرنے کی ہدایت دی۔
انہوں نے واضح کیا کہ کسی بھی قسم کی کوتاہی یا لاپرواہی کی صورت میں محکمانہ کارروائی کی جائے گی اور افسران و اہلکاروں کو صاف ستھری یونیفارم میں ڈیوٹی پر موجود رہنے کی ہدایت دی۔
آخر میں، سید پیر محمد شاہ نے کہا کہ وہ توقع کرتے ہیں کہ تمام افسران اپنے ٹارگٹ پر پورا اتریں گے اور اپنے کام کو بہترین طریقے سے انجام دیں گے۔