صوبائی محتسب سندھ محمد سہیل راجپوت نے متعلقہ افسران کو عوامی شکایات فوری نمٹانے اور پرانی درخواستوں پر بھی جلد کارروائی کرنے کی ہدایت کردی ہے۔
ان کی زیر صدارت محکمے کا ماہوار اجلاس ہوا، جس میں مجموعی کارکردگی کا جائزہ لیا گیا۔ اجلاس میں گزشتہ اور رواں سال اکتوبر میں درج ہونے والی عوامی شکایات کا تقابلی جائزہ بھی لیا گیا۔
ریجنل دفاتر کی کارکردگی بہتر بنانے کی ہدایت
محمد سہیل راجپوت نے اجلاس کو اپنے دورۂ جامشورو، حیدرآباد، میرپورخاص اور سانگھڑ سے متعلق آگاہ کیا۔
انہوں نے کہا کہ ریجنل دفاتر میں بعض انتظامی خامیاں اور افرادی قوت کی کمی دور کرنے کی ضرورت ہے۔ دفاتر میں ریکارڈ کی درستگی اور حفاظت بھی مزید بہتر بنائی جائے گی۔
صوبائی محتسب نے مشیران کو ہدایت کی کہ وہ ہر ماہ کسی ایک ریجنل دفتر کا دورہ کریں۔ اس دوران افرادی قوت اور کارکردگی کا جائزہ بھی لیا جائے۔
محتسب کے فیصلوں پر عملدرآمد کے لیے قانون سازی پر زور
محمد سہیل راجپوت نے کہا کہ بعض جاری کردہ فیصلوں پر عملدرآمد ایک سنگین مسئلہ ہے۔ ان کے مطابق صوبائی محتسب کے فیصلوں پر مؤثر عملدرآمد کے لیے قانون سازی ناگزیر ہے۔
انہوں نے افسران کو پرانی درخواستیں بھی فوری نمٹانے کی ہدایت کی۔
تعلیم، صحت اور صاف پانی کی شکایات ترجیحی بنیادوں پر حل کرنے کا حکم
صوبائی محتسب نے کہا کہ تعلیم، پینے کے صاف پانی اور صحت سے متعلق عوامی شکایات کو ترجیحی بنیادوں پر حل کیا جائے۔
ان کا کہنا تھا کہ تعلیم، صحت اور صاف پانی سے متعلق شکایات مفاد عامہ کے معاملات ہیں۔ اگر کوئی شکایت کنندہ اپنی درخواست واپس لے بھی لے تو مسئلے کے حل کے لیے ازخود نوٹس لیا جائے۔
اجلاس میں سیکریٹری سید جنید احمد، ڈائریکٹر جنرل نسیم الدین میرانی، رجسٹرار، مشیران اور دیگر افسران نے شرکت کی۔
