کراچی کے ضلع ایسٹ میں پولیس نے سی سی ٹی وی فوٹیج کی مدد سے کارروائی کرتے ہوئے موٹر سائیکل لفٹنگ میں ملوث دو ملزمان کو گرفتار کر لیا ہے۔
پولیس کے مطابق گرفتار ملزمان کی شناخت محمد نعمان ولد اقبال خان اور عمران ولد اسلم کے ناموں سے ہوئی ہے۔ دونوں ملزمان کو ایسٹ زون کے تھانہ جمشید کوارٹرز پولیس نے خفیہ اطلاع اور جدید نگرانی کے نظام کی مدد سے گرفتار کیا۔
کارروائی کے دوران ملزمان کے قبضے سے ایک سرقہ شدہ موٹر سائیکل برآمد کی گئی جس کا نمبر KGD-2463 ہے۔ پولیس کے مطابق یہ موٹر سائیکل تھانہ پی آئی بی کالونی کے علاقے سے چوری کی گئی تھی، جس کا مقدمہ نمبر 145/26 دفعہ 381A کے تحت پہلے ہی درج تھا۔
ابتدائی تفتیش میں یہ بات بھی سامنے آئی ہے کہ گرفتار ملزمان اس سے قبل بھی موٹر سائیکل چوری اور گٹکا ماوا فروشی جیسے مقدمات میں جیل جا چکے ہیں۔
پولیس کا کہنا ہے کہ دونوں ملزمان کو ضابطے کے مطابق گرفتار کرکے مزید تفتیش کے لیے متعلقہ حکام کے حوالے کر دیا گیا ہے تاکہ ان کے نیٹ ورک اور دیگر ممکنہ وارداتوں کا بھی سراغ لگایا جا سکے۔