اسلام آباد (نیوز ڈیسک) — وزیراعظم پاکستان شہباز شریف 23 سے 25 مئی تک چین کا اہم سرکاری دورہ کریں گے، جس کے دوران وہ چین کی اعلیٰ سیاسی قیادت سے ملاقاتیں کریں گے اور دونوں ممالک کے درمیان اسٹریٹجک شراکت داری کو مزید مضبوط بنانے پر تفصیلی بات چیت ہوگی۔
تفصیلات کے مطابق وزیراعظم شہباز شریف اپنے دورے کے دوران چینی صدر شی جن پنگ اور وزیراعظم لی چیانگ سے علیحدہ علیحدہ ملاقات کریں گے۔ ان ملاقاتوں میں پاک چین تعلقات، علاقائی صورتحال، اقتصادی تعاون اور جاری منصوبوں پر پیش رفت کا جائزہ لیا جائے گا۔
یہ دورہ اس اعتبار سے بھی خصوصی اہمیت رکھتا ہے کہ اس دوران پاکستان اور چین کے درمیان سفارتی تعلقات کے 75 برس مکمل ہونے کی تقریبات بھی منعقد ہوں گی، جن میں وزیراعظم شہباز شریف بطور مہمان خصوصی شرکت کریں گے۔
سرکاری ذرائع کے مطابق اس دورے کے دوران دونوں ممالک کے درمیان مختلف شعبوں میں تعاون کے لیے متعدد معاہدوں اور مفاہمتی یادداشتوں (MoUs) پر دستخط ہونے کا بھی امکان ہے۔ ان معاہدوں میں توانائی، انفراسٹرکچر، ٹیکنالوجی، تجارت اور سرمایہ کاری کے شعبے شامل ہوں گے۔
مزید بتایا گیا ہے کہ دورے کے دوران پاک چین اقتصادی راہداری (CPEC) کے جاری منصوبوں کا بھی تفصیلی جائزہ لیا جائے گا جبکہ نئے سرمایہ کاری منصوبوں اور صنعتی تعاون کے امکانات پر بھی بات چیت ہوگی۔
وزیراعظم کے اس دورے کو پاکستان اور چین کے درمیان "آہنی دوستی” کو مزید مضبوط بنانے کی ایک اہم پیش رفت قرار دیا جا رہا ہے، جو خطے میں اقتصادی اور اسٹریٹجک تعاون کے نئے دروازے کھول سکتا ہے۔