ایران کے صدر مسعود پزشکیان نے واضح کیا ہے کہ ان کا ملک کسی بھی ملک پر حملہ کرنے کا ارادہ نہیں رکھتا اور ایران صرف اپنے دفاع کے قانونی اور جائز حق کا استعمال کر رہا ہے۔
اسحاق ڈار اور ایرانی وزیر خارجہ کے درمیان رابطہ، خطے میں مذاکرات اور امن عمل پر اتفاق
اپنے بیان میں صدر پزشکیان نے کہا کہ ایران کا بنیادی مؤقف خطے میں امن، استحکام اور سلامتی کے تحفظ پر مبنی ہے اور تہران کسی صورت جنگ کے دائرہ کار کو بڑھانا نہیں چاہتا۔ ان کے مطابق ایران نے نہ کسی جنگ کی ابتدا کی ہے اور نہ ہی کسی تنازع کو ہوا دی ہے۔
صدر پزشکیان نے مزید کہا کہ بعض فریق ایران کے جوہری حقوق کو محدود کرنے کی کوشش کر رہے ہیں، تاہم کسی کو یہ حق حاصل نہیں کہ وہ ایرانی عوام کو ان کے قانونی حقوق سے محروم کرے۔
انہوں نے الزام عائد کیا کہ دشمن اپنی اہداف حاصل کرنے میں ناکام رہا ہے اور اس دوران انفراسٹرکچر، تعلیمی اداروں اور اسپتالوں کو نشانہ بنایا گیا، جو بین الاقوامی قوانین کی خلاف ورزی ہے۔
ایرانی صدر کے مطابق ایران کی تہذیب کو نقصان پہنچانے اور ملک کو کمزور کرنے کے بیانات دشمن کے اصل عزائم کو ظاہر کرتے ہیں، تاہم ایران ہر سطح پر اپنی خودمختاری اور دفاعی صلاحیت کا تحفظ جاری رکھے گا۔