کراچی: 11 مارچ 2026 – وزیر داخلہ سندھ ضیاء الحسن لنجار نے سینٹرل پولیس آفس کراچی کا دورہ کیا اور شہر کی سیکیورٹی صورتحال کا جائزہ لیا۔ اس موقع پر وہ مرکزی کمانڈ اینڈ کنٹرول سینٹر گئے جہاں آئی جی سندھ جاوید عالم اوڈھو نے شہر بھر کی مانیٹرنگ، جلوس روٹس پر سیکیورٹی اور انسدادی اقدامات پر تفصیلی بریفنگ دی۔
وزیر داخلہ سندھ نے کہا کہ موجودہ انتظامات باعث اطمینان ہیں اور پولیس پر عوام کے اعتماد کو مضبوط بنانا وقت کی اہم ضرورت ہے۔ انہوں نے مزید کہا کہ پولیس کو جدید آلات اور جدید دور کے تقاضوں سے ہم آہنگ کرنا حکومت سندھ کی ترجیح ہے۔
انہوں نے یومِ علیؑ کے جلوس کے پرامن انعقاد کو یقینی بنانے کے لیے تمام اداروں کے بھرپور اقدامات کی تعریف کی۔ آئی جی سندھ نے بتایا کہ سی سی ٹی وی کیمروں کے ذریعے جلوس کے تمام روٹس کی مسلسل نگرانی کی جا رہی ہے اور کمانڈ اینڈ کنٹرول روم سے شہر بھر کی سیکیورٹی صورتحال پر مستقل نظر رکھی جا رہی ہے۔
ترجمان وزیر داخلہ سندھ کے مطابق اس دورے کا مقصد نہ صرف سیکیورٹی انتظامات کا جائزہ لینا تھا بلکہ عوام کی حفاظت اور شہر میں امن و امان قائم رکھنے کے لیے پولیس کی تیاریوں کو مزید مضبوط بنانا بھی تھا۔