چیئرمین اعلیٰ ثانوی تعلیمی بورڈ کراچی فقیر محمد لاکھو نے انٹرمیڈیٹ حصہ اول سائنس جنرل گروپ کے سالانہ امتحانات برائے 2025ء کے نتائج کا باضابطہ اعلان کر دیا۔ نتائج کا اعلان انٹربورڈ کراچی کے کمیٹی روم میں منعقدہ تقریب کے دوران کیا گیا، جس میں یونیورسٹیز اینڈ بورڈز ڈپارٹمنٹ حکومتِ سندھ کے اسپیشل سیکرٹری سہیل انور بلوچ بھی موجود تھے۔
نیو کراچی میں اسٹریٹ کرائم کے خلاف کارروائی مسلح ملزم گرفتار
اس موقع پر ناظم امتحانات زرینہ راشد نے نتائج کی تفصیلات سے آگاہ کرتے ہوئے بتایا کہ سائنس جنرل گروپ کے امتحانات میں مجموعی طور پر 19 ہزار 212 امیدواروں نے رجسٹریشن حاصل کی، جن میں سے 18 ہزار 813 امیدوار امتحانات میں شریک ہوئے۔ نتائج کے مطابق 9 ہزار 678 امیدوار تمام چھ پرچوں میں کامیاب قرار پائے، 3 ہزار 542 امیدوار پانچ پرچوں، 2 ہزار 353 چار پرچوں، 1 ہزار 405 تین پرچوں، 860 دو پرچوں جبکہ 580 امیدوار ایک پرچے میں کامیاب ہوئے۔
چیئرمین انٹربورڈ کراچی فقیر محمد لاکھو نے بتایا کہ بورڈ کی تاریخ میں پہلی مرتبہ سائنس جنرل گروپ میں ریاضی کا پرچہ ای مارکنگ کے تحت لیا گیا۔ انہوں نے کہا کہ ریاضی کے پرچے کی جانچ جدید روبریکس (Rubrics) سسٹم کے مطابق ای مارکنگ کے ذریعے کی گئی، جس سے امتحانی عمل میں شفافیت، درستگی اور معیار کو یقینی بنایا گیا ہے۔
انہوں نے مزید کہا کہ انٹربورڈ کراچی امتحانی نظام کو جدید خطوط پر استوار کرنے کے لیے مسلسل اقدامات کر رہا ہے، اور آئندہ سال 2026ء کے سالانہ امتحانات میں انٹرمیڈیٹ کے مزید مضامین کی جانچ بھی ای مارکنگ کے تحت کی جائے گی، تاکہ جدید ٹیکنالوجی کے ذریعے امتحانی نظام کو مزید مؤثر بنایا جا سکے۔