اسلام آباد: ریاستِ قطر کے ایک اعلیٰ سطحی وفد نے انسدادِ منشیات تعاون کو مزید فروغ دینے کے لیے اینٹی نارکوٹکس فورس (اے این ایف) ہیڈکوارٹرز کا دورہ کیا۔ وفد کی قیادت بریگیڈیئر حمد محمد المریخی، اسسٹنٹ ڈائریکٹر فرانزک لیبارٹری ڈیپارٹمنٹ، کر رہے تھے۔
ابراہیم حیدری پولیس کا شادی کی تقریب میں ہوائی فائرنگ کرنے والوں کے خلاف کریک ڈاؤن، 4 ملزمان گرفتار
وفد کا استقبال ڈائریکٹر جنرل اے این ایف، میجر جنرل عبدالمعید ہلالِ امتیاز (ملٹری)، نے سینئر افسران کے ہمراہ کیا۔ ڈی جی اے این ایف نے انسدادِ منشیات کی کوششوں میں بین الاقوامی تعاون کی اہمیت اور قطر کی شراکت کو سراہا۔
دورے کے دوران وفد کو جامع بریفنگ دی گئی اور پھر دوطرفہ مذاکرات ہوئے۔ مذاکرات میں انسدادِ منشیات آپریشنز میں تعاون، فرانزک اشتراک، انٹیلی جنس شیئرنگ اور استعداد کار میں اضافے پر زور دیا گیا۔ دونوں فریقین نے منشیات کے بڑھتے ہوئے مسئلے، خصوصاً نوجوانوں پر اثرات، کے خلاف مشترکہ عزم کا اعادہ کیا۔
مذاکرات میں منشیات فروش تنظیموں کے خلاف مربوط کارروائی پر بھی زور دیا گیا جو علاقائی اور بین الاقوامی راستوں کے ذریعے غیر قانونی منشیات کی ترسیل میں ملوث ہیں۔ پاکستان اور قطر کے درمیان 2025 کے دوران بڑھتے ہوئے باہمی رابطے، خاص طور پر اپریل میں منعقدہ جی سی سی کانفرنس کے بعد، کے مواقع کو بھی اجاگر کیا گیا۔
دونوں ممالک نے منشیات کے استعمال اور اسمگلنگ کے خاتمے کے لیے قومی اور بین الاقوامی سطح پر جامع حکمتِ عملی اپنانے اور اجتماعی اقدامات کے لیے پختہ عزم کا اعادہ کیا۔
