خیبر پختونخوا کے ضلع ہنگو میں سکیورٹی فورسز نے کارروائی کے دوران 8 خوارج کو ہلاک کردیا، جبکہ فائرنگ کے شدید تبادلے میں دو افسران سمیت 6 اہلکار شہید ہوگئے۔
پاک فوج کے شعبۂ تعلقاتِ عامہ (آئی ایس پی آر) کے مطابق ہنگو میں سکیورٹی فورسز کے قافلے اور خوارج کے درمیان فائرنگ کا تبادلہ ہوا۔ فورسز نے مؤثر کارروائی کرتے ہوئے بھارتی سرپرستی میں سرگرم فتنۃ الخوارج کے 8 ارکان کو ہلاک کردیا۔
آئی ایس پی آر کے مطابق فائرنگ کے دوران اپنے دستوں کی قیادت کرنے والے دو افسران اور چار جوانوں نے جان قربان کی۔ شہید ہونے والوں میں 23 سالہ کیپٹن ابوزر فاروق، ضلع گوجرانوالہ کے رہائشی، اور 22 سالہ لیفٹیننٹ شیراز بابر، ضلع چکوال کے رہائشی، شامل ہیں۔
ترجمان پاک فوج کے مطابق دونوں افسران نے چار جوانوں کے ہمراہ مقابلہ کیا اور جان کی قربانی دی۔
آئی ایس پی آر کا کہنا ہے کہ علاقے میں ممکنہ طور پر موجود دیگر خوارج کے خاتمے کے لیے کلیئرنس آپریشن جاری ہے۔
ترجمان کے مطابق سکیورٹی فورسز اور قانون نافذ کرنے والے ادارے عزمِ استحکام کے تحت دہشت گردی کے خلاف کارروائیاں جاری رکھیں گے۔ ان کارروائیوں کا مقصد بیرونی سرپرستی اور معاونت حاصل کرنے والی دہشت گردی کا خاتمہ ہے۔
آئی ایس پی آر نے کہا کہ شہید افسران اور جوانوں کی قربانیاں ملک کے تحفظ کے عزم کو مزید مضبوط کرتی ہیں۔
