نیپا کے قریب کھلے مین ہول میں تین سالہ بچے کی المناک ہلاکت کے بعد گلشن اقبال میں ٹاؤن چیئرمین کے خلاف شہریوں کی جانب سے احتجاجی مہم شروع ہوگئی ہے۔
علاقہ مکینوں نے گلشن اقبال ٹاؤن کے مختلف سیکٹرز، گلیوں اور بازاروں میں ہر کھلے گٹر، ٹوٹی لائن اور کچرے کے ڈھیروں پر ٹاؤن چیئرمین کی تصاویر آویزاں کر دی ہیں۔ ان تصاویر پر ’’منجانب اہلِ علاقہ‘‘، ’’تلاشِ گمشدہ‘‘، ’’عوام کا پیسہ عوام پر خرچ کرو‘‘ اور دیگر طنزیہ جملے درج ہیں، جن کا مقصد مقامی انتظامیہ کی کارکردگی پر سوال اٹھانا ہے۔
شہریوں کا کہنا ہے کہ متعدد بار شکایات کے باوجود گٹروں کے ڈھکن نہیں لگائے گئے اور نہ ہی صفائی ستھرائی کی صورتحال میں بہتری آئی ہے، جس کے باعث آئے روز حادثات پیش آرہے ہیں۔
دوسری جانب گلشن ٹاؤن کے چیئرمین نے خود کو کھلے مین ہولز پر ڈھکن لگانے کی ذمہ داری سے بری الذمہ قرار دے دیا، جس پر علاقہ مکینوں نے شدید ردعمل دیتے ہوئے اسے غیر ذمہ دارانہ طرزِ حکمرانی قرار دیا ہے۔
یاد رہے کہ گزشتہ ہفتے شاہ فیصل کالونی کا رہائشی تین سالہ ابراہیم نیپا چورنگی کے قریب کھلے مین ہول میں گر کر جان کی بازی ہار گیا تھا، جس کے بعد شہری حلقوں میں غم و غصہ پایا جاتا ہے۔
