کراچی: ڈپٹی کمشنر ضلع وسطی کے دفتر میں آج صحافیوں کے ساتھ ایک اہم اجلاس منعقد ہوا، جس میں ضلع کے مختلف انتظامی اور عوامی مسائل پر تفصیلی مشاورت کی گئی۔ اجلاس کا مقصد میڈیا کے ذریعے عوامی مسائل کے حل کے لیے مشترکہ حکمت عملی ترتیب دینا اور صحافیوں کے ساتھ تعلقات کو مضبوط بنانا تھا۔
کراچی: کورنگی پولیس نے موٹر سائیکل لفٹر گینگ گرفتار، چوری شدہ موٹر سائیکلیں اور پارٹس برآمد
اجلاس میں کئی اہم امور پر تبادلہ خیال کیا گیا، جن میں شامل ہیں:
-
کھلے گٹروں اور مین ہولز کے خطرات سے بچاؤ کے لیے فوری طور پر ڈھکن لگانے کی مہم، جس میں بڑی سڑکوں کے لیے واٹر بورڈ اور ذیلی سڑکوں کے لیے یوسی چیئرمین ذمہ دار ہوں گے۔
-
خطرناک مقامات اور بڑے نالوں کے ارد گرد سیفٹی بیریئرز لگانے کی ضرورت پر زور۔
-
رہائشی علاقوں میں غیر محفوظ طریقے سے گیس سلنڈرز کی فروخت کرنے والی دکانوں کا ضابطہ کار کے تحت جائزہ اور کارروائی، جس میں گیس سلنڈر ایسوسی ایشن اور اوگرا کی ذمہ داری شامل۔
-
شہر میں تجاوزات کے مسئلے کے مستقل حل کے لیے مربوط مہم کی اہمیت۔
-
جعلی یا من گھڑت خبروں کے پھیلاؤ کو روکنے اور حقائق پر مبنی معلومات عوام تک بروقت پہنچانے کے لیے مؤثر نظام کی حکمت عملی۔
-
صحافیوں کے لیے ڈپٹی کمشنر آفس کی جانب سے مخصوص واٹس ایپ گروپ کے قیام کا اعلان، تاکہ کسی بھی معاملے پر فوری موقف حاصل کیا جا سکے۔
ڈپٹی کمشنر نے صحافیوں سے کہا کہ ضلعی انتظامیہ عوامی خدمت اور شفافیت کے لیے پرعزم ہے اور تعمیری تنقید کے ذریعے انتظامیہ کی رہنمائی جاری رکھیں تاکہ ضلع وسطی کو مثالی ضلع بنایا جا سکے۔
اجلاس کے اختتام پر صحافیوں نے ڈپٹی کمشنر کے مشاورتی اقدام کو سراہا اور مکمل تعاون کی یقین دہانی کرائی۔