ڈسٹرکٹ ویسٹ پولیس نے گزشتہ ایک ہفتے کے دوران مختلف کارروائیوں میں 88 ملزمان کو گرفتار کرنے کا دعویٰ کیا ہے۔ پولیس کے مطابق کارروائیاں ایس ایس پی ویسٹ طارق الٰہی مستوئی کی زیرقیادت کی گئیں۔
پولیس کے مطابق گرفتار ملزمان میں 24 اسٹریٹ کرمنلز، 11 منشیات فروش اور 14 گٹکا ماوا فروش شامل ہیں۔ دیگر جرائم میں ملوث ملزمان کو بھی گرفتار کیا گیا۔
مقابلوں میں ایک ملزم ہلاک
ڈسٹرکٹ ویسٹ پولیس کے مطابق گزشتہ ہفتے پولیس اور ملزمان کے درمیان 4 مبینہ مقابلے ہوئے۔
ان مقابلوں میں ایک ملزم ہلاک اور 4 زخمی حالت میں گرفتار ہوئے۔ مزید 2 ملزمان کو بغیر زخمی ہوئے گرفتار کیا گیا۔
پولیس کے مطابق ایک مقابلے کے دوران اے ایس آئی نعمان شیخ بھی معمولی زخمی ہوئے۔
اشتہاری اور مفرور ملزمان بھی گرفتار
پولیس نے اشتہاری اور مفرور ملزمان کے خلاف بھی کارروائیاں کیں۔ ان کارروائیوں میں 11 اشتہاری اور مفرور ملزمان کو گرفتار کیا گیا۔
پولیس کے مطابق گرفتار ملزمان کے قبضے سے ایک منی رائفل اور مختلف اقسام کے 21 پستول برآمد ہوئے۔ اسلحے کے ساتھ ایمونیشن بھی تحویل میں لیا گیا۔
منشیات اور گٹکا ماوا برآمد
پولیس کے مطابق کارروائیوں کے دوران 198 گرام آئس، 110 گرام چرس اور 11 گرام ہیروئن برآمد ہوئی۔
اس کے علاوہ 6 بوتلیں شراب، 245 کلو غیر ملکی گٹکا اور 23 کلو تمباکو بھی برآمد کیا گیا۔
پولیس نے 943 کلو گٹکا ماوا اور جیلانی پاؤڈر بھی تحویل میں لینے کا دعویٰ کیا ہے۔
گاڑیاں اور موبائل فون بھی برآمد
ڈسٹرکٹ ویسٹ پولیس کے مطابق کارروائیوں میں 11 موبائل فونز اور 5 موٹر سائیکلیں برآمد ہوئیں۔ پولیس نے 5 گاڑیاں اور نقد رقم بھی تحویل میں لی۔
پولیس کا کہنا ہے کہ تمام گرفتاریاں ضلع ویسٹ کے مختلف تھانوں کی حدود میں کی گئیں۔
گرفتار ملزمان کے خلاف متعلقہ تھانوں میں مقدمات درج کرلیے گئے ہیں۔ ملزمان کو مزید تفتیش کے لیے تفتیشی حکام کے حوالے کردیا گیا ہے۔
