کراچی: واٹر کارپوریشن نے متاثرہ حب کینال کے حصے کا مرمتی کام کامیابی کے ساتھ مکمل کر لیا ہے۔ ترجمان کے مطابق صرف 72 گھنٹوں کی قلیل مدت میں مرمتی عمل مکمل کرکے کینال کو دوبارہ فعال بنا دیا گیا۔
فتنۃ الخوارج کی بڑھتی پریشانی، خارجی سرغنہ کے اندرونی اختلافات اور ہولناک انکشافات سامنے آ گئے
ترجمان نے بتایا کہ مرمتی کام بغیر کسی وقفے کے دن رات چوبیس گھنٹے جاری رہا۔ مرمتی عمل مکمل ہونے کے بعد رائزنگ مین اور لائنوں کو چارج کرنے کا کام جاری ہے۔
انہوں نے کہا کہ لائنوں کے مکمل چارج ہوتے ہی ضلع وسطی، ضلع غربی اور ضلع کیماڑی میں پانی کی فراہمی بحال کر دی جائے گی۔
ترجمان کے مطابق حالیہ شدید بارشوں، پہاڑوں سے آنے والے پانی اور ناردرن بائی پاس سے گزرنے والے بڑے سیلابی ریلے کے باعث حب کینال کو نقصان پہنچا تھا جس کے بعد فراہمی متاثر ہوئی۔
شہریوں کو پانی کی قلت کے باعث درپیش مشکلات پر واٹر کارپوریشن کی جانب سے معذرت بھی کی گئی ہے۔