کراچی (اسٹاف رپورٹر) انسپکٹر جنرل سندھ پولیس غلام نبی میمن نے کہا ہے کہ الحمدللہ جشنِ میلادالنبی ﷺ اپنے آغاز سے اختتام تک پُرامن اور محفوظ رہا۔ اس موقع پر بہترین سیکیورٹی انتظامات کرنے پر سندھ پولیس کے افسران اور اہلکاروں کو خصوصی شاباش دی گئی۔
یوم فضائیہ بہادر شاہینوں کی لازوال قربانیوں کی یاد دلاتا ہے، وزیر داخلہ سندھ
آئی جی سندھ نے کہا کہ اہم ایونٹس پر فول پروف سیکیورٹی اقدامات سندھ پولیس کا طرّہ امتیاز ہیں۔ میلاد النبی ﷺ کے جلوسوں اور محافل میں امن و امان قائم رکھنے میں علمائے کرام، اکابرین اور تمام مسالک کا تعاون بھی لائقِ تحسین ہے۔
انہوں نے مزید کہا کہ عوام کے تحفظ کو یقینی بنانے کے لیے سندھ پولیس کا لائحہ عمل ہر سطح پر مؤثر اور مربوط رہا۔ پولیس کے مؤثر سیکیورٹی اقدامات اور عوام کے تعاون کی بدولت جشنِ میلادالنبی ﷺ پر پُرامن فضا قائم رہی۔
آئی جی سندھ غلام نبی میمن نے کہا کہ سیکیورٹی اور ٹریفک فرائض پر مامور افسران و اہلکاروں نے فرض شناسی کی اعلیٰ مثال قائم کی، جس پر انہیں خصوصی شاباش پیش کی جاتی ہے۔