کراچی: سندھ بلڈنگ کنٹرول اتھارٹی (SBCA) نے صوبے بھر کی فیکٹریوں میں فائر سیفٹی کے انتظامات یقینی بنانے کے لیے فوری ہدایات جاری کر دی ہیں۔ اتھارٹی نے فیکٹری مالکان کو حفاظتی نظام نصب کرنے اور ہنگامی راستے کھلے رکھنے کی ہدایت کی ہے۔
ایس بی سی اے کے مطابق تمام صنعتی اداروں میں فائر سیفٹی کے مؤثر انتظامات انسانی جانوں کے تحفظ کے لیے ضروری ہیں۔ اس سلسلے میں فیکٹریوں میں آگ سے بچاؤ سے متعلق ہدایتی بینرز بھی آویزاں کیے گئے ہیں۔
اتھارٹی نے فیکٹری مالکان کو ہدایت کی ہے کہ وہ اپنے احاطے کے لیے متعلقہ ادارے سے اے او پی یا آسکیوپینسی سرٹیفکیٹ حاصل کریں۔
ہدایت نامے کے مطابق فیکٹریوں میں منظور شدہ فائر فائٹنگ آلات اور جدید حفاظتی نظام فوری طور پر نصب کیے جائیں۔ ہنگامی راستوں کو ہر وقت کھلا رکھا جائے اور ان کے سامنے کسی قسم کی رکاوٹ نہ ہو۔
ایس بی سی اے نے فیکٹریوں میں مناسب تعداد میں آگ بجھانے والے آلات نصب کرنے اور انہیں ہر وقت فعال حالت میں رکھنے کی بھی ہدایت کی ہے۔ اس کے علاوہ قابلِ اعتماد فائر الارم سسٹم نصب کرنے اور اس کی باقاعدگی سے جانچ کی جائے۔
اتھارٹی نے برقی حفاظت پر بھی زور دیا ہے۔ فیکٹری مالکان کو محفوظ وائرنگ یقینی بنانے، بجلی کے نظام پر اوورلوڈنگ سے گریز کرنے اور باقاعدگی سے برقی معائنہ کرانے کی ہدایت کی گئی ہے۔
ایس بی سی اے نے فیکٹری مالکان پر زور دیا ہے کہ وہ حفاظتی قوانین کی پابندی اور انسانی جانوں کے تحفظ کو اولین ترجیح دیں۔ اتھارٹی کے مطابق محفوظ صنعتی ادارے ایک محفوظ اور مستحکم سندھ کے لیے ضروری ہیں