بھارت نے ایک بار پھر پاکستان سے سفارتی سطح پر رابطہ کرکے دریائے ستلج اور توی میں ممکنہ سیلابی صورت حال سے آگاہ کیا ہے۔ وزارت آبی وسائل کے مطابق، بھارتی ہائی کمیشن نے پاکستان کو خطوط کے ذریعے پانی کے بڑھتے ہوئے درجوں اور سیلاب کے خطرات سے متعلق معلومات فراہم کی ہیں۔
وزارت آبی وسائل نے ایک انتباہی خط جاری کیا ہے جس میں بتایا گیا ہے کہ دریائے ستلج کے فیروز پور کے مقام پر اور توی کے جموں کے مقام پر شدید سیلاب کا خدشہ ظاہر کیا گیا ہے۔ اس سے قبل بھارت نے دریائے چناب میں بھی سیلابی صورتحال سے آگاہ کیا تھا۔
رپورٹ کے مطابق، وزارت نے 28 اہم محکموں کو بھارت سے موصولہ معلومات سے آگاہ کرتے ہوئے فوری اقدامات اور احتیاطی تدابیر اختیار کرنے کی ہدایت کی ہے۔ یاد رہے کہ 25 اگست کو بھارت نے سندھ طاس معاہدے کے بغیر اور پاکستان سے مئی میں جنگ کے بعد پہلی بار سرکاری سطح پر رابطہ کیا تھا، اور دریائے توی میں ممکنہ سیلاب سے آگاہ کیا تھا۔
سرکاری ذرائع کا کہنا ہے کہ بھارت کی جانب سے پیشگی اطلاع کے بعد، حکومت نے الرٹ جاری کرتے ہوئے ضروری حفاظتی اقدامات کیے ہیں۔ پاکستان کو درپیش سیلابی خطرات سے نمٹنے کے لیے تمام متعلقہ اداروں کو الرٹ رہنے کی ہدایت دی گئی ہے۔