راولپنڈی: گزشتہ روز راولپنڈی میں کھیلے گئے بنگلادیش اور نیوزی لینڈ کے میچ کے دوران ایک غیر متوقع واقعہ پیش آیا جب ایک تماشائی سیکیورٹی حصار توڑ کر میدان میں داخل ہوگیا اور کیوی کھلاڑیوں راچن رویندرا اور ٹام لیتھم سے گلے ملا۔
ماتحت عدالتوں کے فیصلے کے باوجود نوکری بحال نہ ہونے پر سائل آصف جاوید نے خود کو آگ لگا لی
تشکر نیوز کے مطابق، یہ تماشائی عبدالقیوم نامی شخص تھا، جو فتح جنگ، اٹک کا رہائشی ہے۔ عبدالقیوم نے میچ دیکھنے کے لیے ایک ہزار روپے کا ٹکٹ خرید کر میرا بخش انکلوژر میں جگہ لی، تاہم بعد میں یاسر عرفات انکلوژر میں جا پہنچا اور وہاں سے جنگلہ عبور کرتے ہوئے میدان میں داخل ہوگیا۔
گراؤنڈ میں موجود سیکیورٹی اہلکاروں نے اسے روکنے کی کوشش کی، مگر وہ کھلاڑیوں تک پہنچنے میں کامیاب ہوگیا۔ اس دوران، تماشائی کے ہاتھ میں ایک مخصوص مذہبی و سیاسی جماعت کا پوسٹر بھی موجود تھا، جس پر حکام نے فوری کارروائی کرتے ہوئے اسے گرفتار کرلیا۔
پولیس نے تھانہ نیو ٹاؤن میں عبدالقیوم کے خلاف مقدمہ درج کرلیا ہے اور مزید تفتیش جاری ہے۔ تاہم، بھارتی میڈیا اس واقعے کو دہشت گردی سے جوڑنے کی کوشش کر رہا ہے تاکہ پاکستان میں بین الاقوامی کرکٹ کے دروازے دوبارہ بند کیے جا سکیں۔ پاکستان کرکٹ بورڈ اور سیکیورٹی اداروں نے اس تاثر کی سختی سے تردید کرتے ہوئے اسے ایک انفرادی واقعہ قرار دیا ہے، جس پر مناسب قانونی کارروائی کی جا رہی ہے۔