سندھ اسمبلی میں کچے کے علاقوں کی ترقی، بحالی اور عوامی مسائل کے حل سے متعلق اعلیٰ سطحی اجلاس ہوا۔
اجلاس کی صدارت چیئرپرسن قائمہ کمیٹی برائے داخلہ فریال تالپور نے کی۔
اجلاس میں سکھر اور لاڑکانہ ڈویژن کے کچے علاقوں میں جاری ترقیاتی منصوبوں کا جائزہ لیا گیا۔ سماجی و اقتصادی بہتری اور بنیادی سہولیات کی فراہمی پر بھی غور کیا گیا۔
تعلیم اور صحت کی سہولیات کا جائزہ
کمشنرز سکھر اور لاڑکانہ نے اجلاس کو کچے کے علاقوں کی صورتحال پر بریفنگ دی۔
بریفنگ میں تعلیم اور صحت کے منصوبوں سے آگاہ کیا گیا۔ موبائل ڈسپنسریز، سڑکوں اور دیگر بنیادی ڈھانچے کی ضروریات بھی زیر بحث آئیں۔
اجلاس میں کچے کے علاقوں میں عوام کو بنیادی سہولیات کی فراہمی بہتر بنانے پر بھی غور کیا گیا۔
امن و امان پر بھی غور
اجلاس میں کچے کے علاقوں میں امن و امان سے متعلق اقدامات کا بھی جائزہ لیا گیا۔
اجلاس میں وزیر داخلہ ضیاء الحسن لنجار، وزیر آبپاشی جام خان شورو، آئی جی سندھ اور دیگر متعلقہ حکام نے شرکت کی۔
سکھر اور لاڑکانہ کے کمشنرز اور ڈی آئی جیز بھی اجلاس میں موجود تھے۔
ارکان قومی و صوبائی اسمبلی اور مختلف محکموں کے سیکریٹریز نے بھی اجلاس میں شرکت کی۔
اجلاس میں بورڈ آف ریونیو، پلاننگ اینڈ ڈیولپمنٹ، ورکس اینڈ سروسز، آبپاشی، اسکول ایجوکیشن، صحت، زراعت، توانائی، لوکل گورنمنٹ اور بحالی سمیت دیگر محکموں کے افسران شریک ہوئے۔
