شاہین فورس کے اہلکاروں سے خطاب کرتے ہوئے ڈی آئی جی ساؤتھ نے اسٹریٹ کرائم کے خلاف ٹارگٹڈ کارروائیاں مزید مؤثر بنانے کی ہدایت جاری کی ہے۔
گارڈن ہیڈکوارٹر کراچی میں منعقدہ دربار میں ڈی آئی جی ساؤتھ نے ساؤتھ زون کے تینوں اضلاع سے تعلق رکھنے والے شاہین فورس کے اہلکاروں کے مسائل سنے۔ انہوں نے کئی معاملات پر موقع پر ہی احکامات بھی جاری کیے۔
ڈی آئی جی ساؤتھ نے اہلکاروں کو ہدایت دی کہ مشتبہ افراد کا سامنا ہونے پر فوری طور پر بیک اپ طلب کریں۔ انہوں نے دورانِ گشت بلٹ پروف جیکٹ اور دیگر حفاظتی سامان کے لازمی استعمال پر بھی زور دیا۔
انہوں نے کہا کہ شاہین فورس کے اہلکار نظم و ضبط، جسمانی فٹنس، پیشہ ورانہ مہارت اور ہر وقت الرٹ رہنے کو اپنی ترجیح بنائیں۔
ڈی آئی جی ساؤتھ نے اہلکاروں کو شہریوں سے خوش اخلاقی کے ساتھ پیش آنے کی ہدایت بھی کی۔ انہوں نے کہا کہ کسی شہری کو بلاوجہ ہراساں نہ کیا جائے۔
انہوں نے واضح کیا کہ کارروائیاں صرف جرائم پیشہ عناصر، ڈاکوؤں اور دیگر معاشرہ دشمن افراد کے خلاف کی جائیں۔
ڈی آئی جی ساؤتھ نے کہا کہ شاہین فورس کی کارکردگی کی مسلسل مانیٹرنگ کی جائے گی۔
انہوں نے خبردار کیا کہ غفلت یا ناقص کارکردگی دکھانے والے افسران اور اہلکاروں کے خلاف سخت کارروائی ہوگی۔
انہوں نے اہلکاروں کو یقین دلایا کہ ان کے مسائل کے حل اور فلاح و بہبود کو ترجیح دی جائے گی۔
