گٹکا ماوا کے خلاف کراچی کے ضلع کورنگی میں ٹارگٹڈ کارروائیوں کے دوران پولیس نے چھ ملزمان کو گرفتار کر لیا۔
ڈی آئی جی ایسٹ زون کے احکامات پر ایس ڈی پی او جمشید ڈویژن اے ایس پی محمد عاشر کی نگرانی میں ٹاسک فورس نے متعلقہ تھانوں کی پولیس کے ساتھ مشترکہ کارروائیاں کیں۔
پولیس کے مطابق مختلف علاقوں میں مضر صحت گٹکا ماوا اور چورا کی خرید و فروخت میں ملوث افراد کو گرفتار کیا گیا۔
تھانہ شاہ فیصل کالونی کی حدود سے محمد حنیف کو گرفتار کیا گیا، جبکہ ایک ملزم ریان فرار ہو گیا۔ پولیس نے 200 پڑیاں گٹکا ماوا، دو ہزار روپے نقد رقم اور ایک موبائل فون برآمد کیا۔ اس مقدمے کا اندراج گٹکا ماوا ایکٹ 2019 کے تحت کیا گیا۔
تھانہ کھوکھراپار کی حدود سے عثمان کو گرفتار کیا گیا۔ پولیس نے اس کے قبضے سے 55 پڑیاں گٹکا ماوا، ایک ہزار 100 روپے نقد رقم اور ایک موبائل فون برآمد کیا۔
تھانہ کورنگی انڈسٹریل ایریا میں احمد شاہ عرف ملنگی کو گرفتار کیا گیا۔ پولیس نے 25 پڑیاں گٹکا ماوا، 31 ہزار 200 روپے نقد رقم اور ایک موبائل فون قبضے میں لے لیا۔
تھانہ زمان ٹاؤن کی حدود سے طارق کو گرفتار کیا گیا۔ اس کے قبضے سے 300 پڑیاں مضر صحت چورا اور گٹکا ماوا، جبکہ 150 روپے نقد رقم برآمد ہوئی۔
اسی تھانے کی ایک اور کارروائی میں ارسلان اور محمد کیف کو گرفتار کیا گیا۔ پولیس نے ان کے قبضے سے ایک ہزار 200 پڑیاں مضر صحت چورا اور گٹکا ماوا، سات ہزار 450 روپے نقد رقم اور تین موبائل فون برآمد کیے۔
پولیس نے تمام برآمد شدہ مضر صحت اشیا قبضے میں لے کر مقدمات درج کر لیے ہیں۔ مزید تفتیش کے لیے کیسز انویسٹی گیشن ونگ کے حوالے کر دیے گئے ہیں۔
