اسلام آباد: پیٹرول قیمت میں اضافے کا اعلان کرتے ہوئے حکومت نے پیٹرول اور ہائی اسپیڈ ڈیزل کی نئی قیمتوں کا نوٹیفکیشن جاری کر دیا ہے۔ نئی قیمتوں کا اطلاق رات 12 بجے سے ہو گیا۔
پیٹرولیم ڈویژن کے مطابق پیٹرول کی قیمت میں 13 روپے 18 پیسے فی لیٹر اضافہ کیا گیا، جس کے بعد نئی قیمت 310 روپے 71 پیسے فی لیٹر مقرر کر دی گئی۔
اسی طرح ہائی اسپیڈ ڈیزل کی قیمت میں 13 روپے 80 پیسے فی لیٹر اضافہ کیا گیا، جس کے بعد ڈیزل 323 روپے 30 پیسے فی لیٹر میں دستیاب ہوگا۔
پیٹرولیم ڈویژن نے پیٹرولیم لیوی کا الگ نوٹیفکیشن بھی جاری کیا، جس کے مطابق پیٹرول پر فی لیٹر لیوی میں 9 روپے 64 پیسے اضافہ کر دیا گیا ہے۔ اس اضافے کے بعد پیٹرول پر لیوی 80 روپے فی لیٹر ہو گئی، جبکہ اس سے قبل یہ 70 روپے 36 پیسے فی لیٹر تھی۔
نوٹیفکیشن کے مطابق ہائی اسپیڈ ڈیزل پر 70 روپے 82 پیسے فی لیٹر اور مٹی کے تیل پر 20 روپے 36 پیسے فی لیٹر لیوی بدستور برقرار رہے گی۔
حکومت کی جانب سے پیٹرولیم مصنوعات کی قیمتوں میں یہ اضافہ ایسے وقت میں کیا گیا ہے جب ایندھن کی قیمتوں میں ردوبدل کا براہِ راست اثر ٹرانسپورٹ، اشیائے ضروریہ کی ترسیل اور مجموعی مہنگائی پر پڑنے کا امکان ہوتا ہے۔