سیکیورٹی ذرائع نے بتایا ہے کہ 10 مئی 2025 کا دن بھارتی تاریخ میں ایک ناقابلِ فراموش دن کے طور پر یاد رکھا جائے گا۔ اس روز پاک فوج نے دشمن کی جارحیت کا بھرپور جواب دیتے ہوئے ’فتح 1‘ اور ’فتح 2‘ میزائلوں سے پٹھان کوٹ ایئر بیس پر انتہائی کامیاب حملے کیے۔ ان میزائل حملوں میں بھارتی فضائی تنصیبات اور عسکری اہداف راکھ کا ڈھیر بن گئے۔
آئی اے ای اے کی تصدیق بھارتی حملوں کے دوران پاکستان کی جوہری تنصیبات محفوظ کوئی تابکاری خارج نہیں ہوئی
ذرائع کے مطابق فتح 1 اور فتح 2 میزائل سسٹمز نے انتہائی درستی کے ساتھ دشمن کی تنصیبات کو نشانہ بنایا، جن میں ملٹری ایئربیسز، براہموس اسٹوریج سائٹس اور میزائل دفاعی نظام ’ایس 400‘ شامل تھے۔ پاکستان نے اپنی دفاعی صلاحیتوں کا موثر مظاہرہ کرتے ہوئے بھارت کے کئی اہم عسکری مراکز کو شدید نقصان پہنچایا۔
یہ پیش رفت 22 اپریل 2025 کو پہلگام واقعے کے بعد شروع ہونے والی کشیدگی کے تناظر میں سامنے آئی، جب بھارت نے پاکستان پر الزامات کی بوچھاڑ کی اور تعلقات بدترین سطح پر جا پہنچے۔ بھارت نے سندھ طاس معاہدہ معطل کرنے، پاکستانی سفارتی عملے پر پابندیاں لگانے اور پاکستانیوں کے ویزے منسوخ کرنے جیسے اقدامات کیے۔
جواب میں پاکستان نے بھرپور سفارتی ردعمل دیتے ہوئے بھارتی سفارتی عملے پر پابندیاں عائد کیں، عام بھارتیوں کے ویزے منسوخ کیے، تجارتی روابط منقطع کیے اور بھارتی پروازوں کے لیے فضائی حدود بند کر دی۔
بھارت نے 6 اور 7 فروری کی درمیانی شب کو پاکستان کے مختلف شہروں پر میزائل حملے کیے، جن میں 26 پاکستانی شہری شہید اور 46 زخمی ہوئے۔ پاکستان نے فوری جوابی کارروائی کرتے ہوئے بھارت کے 5 جنگی طیارے، جن میں 3 رافیل بھی شامل تھے، تباہ کیے۔
10 فروری کی شب بھارت کی جانب سے پاکستانی ایئربیسز پر حملوں کے بعد پاکستان نے اگلی صبح ’آپریشن بنیان مرصوص‘ (آہنی دیوار) کا آغاز کیا، جس میں بھارت کے ادھم پور، پٹھان کوٹ، آدم پور ایئربیسز، براہموس میزائل سائٹ، اور میزائل دفاعی نظام ’ایس 400‘ سمیت اہم عسکری مقامات کو تباہ کیا گیا۔
سیکیورٹی ذرائع کا کہنا ہے کہ پاکستان نے اُن بھارتی ایئربیسز کو نشانہ بنایا جہاں سے پاکستانی عوام اور عبادت گاہوں کو ٹارگٹ کیا گیا تھا۔ فتح 1 اور 2 میزائلوں سے بیاس میں موجود براہموس اسٹوریج سائٹ، پٹھان کوٹ ایئرفیلڈ، راجوڑی اور نوشہرہ میں دہشت گردی کے لیے قائم بھارتی ملٹری انٹیلیجنس مراکز بھی مکمل طور پر تباہ کیے گئے۔