شہرِ قائد میں خوف کی علامت بننے والا بدنام زمانہ "ماما گینگ” آخرکار قانون کی گرفت میں آ گیا۔ شاہراہِ نور جہاں تھانے کی پولیس نے کارروائی کرتے ہوئے گینگ کے پانچ اہم کارندوں کو گرفتار کر لیا، جن میں مرکزی ملزم زاہد عرف "ماما” بھی شامل ہے جو زخمی حالت میں پولیس کے ہتھے چڑھا۔
نریندر مودی کا خطاب: بے رنگ لہجہ، الزامات کی تکرار اور سچائی سے انکار
ایس ایس پی ڈسٹرکٹ سینٹرل کے مطابق، ملزمان شہر کے مختلف علاقوں میں دودھ کی دکانوں اور بیکریوں کو نشانہ بنا رہے تھے۔ ان کی وارداتوں کا طریقہ کار منظم اور منصوبہ بند تھا؛ ایک کرولا کار میں موجود ملزمان لوٹ مار کرتے جبکہ دیگر موٹر سائیکل سوار ساتھی بیک اپ فراہم کرتے۔
ملزمان نے اعتراف کیا کہ وہ شریف آباد، لیاقت آباد، شاہراہ نور جہاں، تیموریہ اور نیو کراچی کے علاقوں میں درجنوں وارداتیں کر چکے ہیں۔ سمن آباد میں ایک ڈکیتی کے دوران مزاحمت پر فائرنگ کا بھی انکشاف ہوا ہے۔
پولیس کا کہنا ہے کہ وارداتوں کی سی سی ٹی وی فوٹیجز حاصل کر لی گئی ہیں، جن کی مدد سے شواہد مزید مضبوط ہوئے ہیں۔ حیران کن طور پر ملزمان کے ایک ساتھی نادر نے کچھ وارداتوں میں پولیس کی وردی استعمال کرنے کا اعتراف بھی کیا۔
گرفتاری کے دوران ملزمان کے قبضے سے درج ذیل اسلحہ و سامان برآمد کیا گیا:
تین عدد نائن ایم ایم پسٹل
دو عدد 30 بور پسٹل
21 عدد چھینے ہوئے موبائل فون
ایک عدد چھینی گئی موٹر سائیکل (ون ٹو فائیو)
ایک عدد مسروقہ کرولا کار
پولیس نے بتایا کہ ملزمان سے مزید تفتیش جاری ہے اور دوسرے تھانوں میں درج مقدمات میں بھی ان کی گرفتاری کی جا رہی ہے۔
