کراچی – شہر قائد میں تجاوزات کے خلاف ایک بڑے اور منظم آپریشن کا آغاز آج سے کیا جا رہا ہے۔ اس آپریشن کا پہلا مرحلہ ضلع وسطی سے شروع ہوگا، جہاں مرکزی سڑکوں اور برساتی نالوں سے غیر قانونی تعمیرات کو ہٹانے کے لیے مکمل حکمتِ عملی تیار کرلی گئی ہے۔
دو سال پرانے ٹوئٹ پر اجلاس؟ وزارت غذائی تحفظ کی نااہلی سامنے آگئی
یہ فیصلہ میئر کراچی بیرسٹر مرتضیٰ وہاب کی زیرِ صدارت کے ایم سی ہیڈ آفس میں ہونے والے اہم اجلاس میں کیا گیا، جس میں میونسپل کمشنر ایس ایم افضل زیدی، ڈپٹی کمشنر وسطی طحہٰ سلیم، فنانشل ایڈوائزر گلزار ابڑو اور دیگر اعلیٰ حکام شریک ہوئے۔
میئر کراچی کا کہنا تھا کہ:
"یہ کارروائیاں شہریوں کی مشکلات ختم کرنے کے لیے کی جا رہی ہیں، فٹ پاتھوں اور سڑکوں پر قبضے نہ صرف پیدل چلنے والوں بلکہ تاجروں کے لیے بھی مشکلات کا باعث بنتے ہیں۔”
انہوں نے دوٹوک انداز میں کہا کہ برساتی نالوں، سڑکوں اور قبرستانوں پر قبضہ کسی صورت برداشت نہیں کیا جائے گا، اور عدالتی احکامات پر مکمل عملدرآمد کیا جائے گا۔
ایک جامع اور غیر جانبدارانہ مہم
مرتضیٰ وہاب نے کہا کہ یہ مہم صرف کے ایم سی کی سطح تک محدود نہیں بلکہ اس میں ضلعی انتظامیہ سمیت تمام اسٹیک ہولڈرز کو شامل کیا جا رہا ہے تاکہ کارروائی مؤثر ہو اور اس کے مثبت نتائج جلد سامنے آئیں۔
اجلاس کے دوران ضلع وسطی کے لیے اسٹریٹجک پلان تیار کیا گیا اور مہم کے تمام پہلوؤں کا تفصیلی جائزہ لیا گیا۔ اس بات پر زور دیا گیا کہ قبضہ مافیا کے خلاف بلا امتیاز کارروائی کی جائے گی۔
تعاون کی اپیل
میئر کراچی نے تاجر برادری اور دکانداروں سے بھی اپیل کی کہ وہ تجاوزات کے خاتمے میں تعاون کریں، اور فٹ پاتھوں یا سڑکوں پر قبضہ کرنے سے گریز کریں۔ ان کا کہنا تھا:
"کراچی کی بہتری کے لیے معاشرے کے ہر فرد کو اپنا کردار ادا کرنا ہوگا، کے ایم سی شہریوں کو بہتر بلدیاتی سہولیات فراہم کرنے کے لیے ہر ممکن قدم اٹھا رہی ہے۔”
انہوں نے اس عزم کا اظہار بھی کیا کہ یہ آپریشن صرف ضلع وسطی تک محدود نہیں رہے گا بلکہ شہر کے دیگر اضلاع میں بھی اس کا دائرہ کار جلد پھیلایا جائے گا۔