وزیراعلیٰ سندھ کا پانی کے عالمی دن پر پیغام پانی زندگی ہے، اس کی حفاظت ہم سب کی ذمہ داری ہے

وزیراعلیٰ سندھ سید مراد علی شاہ نے پانی کے عالمی دن کے موقع پر اپنے پیغام میں پانی کے تحفظ کی اہمیت پر زور دیتے ہوئے کہا کہ زمین کا مستقبل محفوظ بنانے کے لیے پانی کے وسائل کی حفاظت ناگزیر ہے۔
عالمی یومِ آب پانی کے تحفظ اور پائیدار انتظام پر میئر کراچی کا عزم

پانی کا بحران اور سندھ کی معیشت پر اثرات

وزیراعلیٰ سندھ نے کہا کہ پانی کی قلت سندھ کے کسانوں اور ماہی گیروں کے لیے ایک بڑا چیلنج بن چکی ہے، جبکہ دریائے سندھ میں بہاؤ کی کمی سے لاکھوں افراد کے روزگار کو خطرہ لاحق ہے۔ انہوں نے مزید کہا کہ ماحولیاتی تبدیلی اور پانی کی غیرمنصفانہ تقسیم نے دریائے سندھ کے وجود کو بھی خطرے میں ڈال دیا ہے، جو زراعت اور معیشت کے لیے خطرے کی گھنٹی ہے۔

دریائے سندھ کے حقوق پر کوئی سمجھوتہ نہیں ہوگا

مراد علی شاہ نے واضح کیا کہ سندھ حکومت دریائے سندھ کے پانی کے حقوق پر کوئی سمجھوتہ نہیں کرے گی۔ انہوں نے نئے کینال منصوبوں پر شدید تحفظات کا اظہار کرتے ہوئے کہا کہ یہ فیصلے سندھ میں پانی کے بحران کو مزید سنگین بنا دیں گے اور قحط کے خدشات کو بڑھا دیں گے۔

پانی کے بحران سے نمٹنے کے لیے سندھ حکومت کے اقدامات

وزیراعلیٰ نے کہا کہ سندھ حکومت نے پانی کے بحران سے نمٹنے کے لیے مؤثر حکمت عملی تیار کر لی ہے۔ انہوں نے وفاقی حکومت سے مطالبہ کیا کہ پانی کی منصفانہ تقسیم کو یقینی بنایا جائے تاکہ ہر صوبے کو اس کے حصے کا پانی مل سکے۔

پانی کی حفاظت ہمارا قومی فرض

وزیراعلیٰ سندھ نے عوام سے اپیل کی کہ پانی کے ہر قطرے کی حفاظت کریں اور پانی کے ضیاع کو روک کر اپنی نسلوں کے لیے ایک محفوظ مستقبل یقینی بنائیں۔