کراچی: ایف آئی اے امیگریشن نے جناح انٹرنیشنل ایئرپورٹ پر دو بڑی کارروائیاں کرتے ہوئے ایک افغان شہری کی جعلی دستاویزات پر برازیل جانے کی کوشش ناکام بنا دی جبکہ انسانی اسمگلنگ کا شکار ایک پاکستانی شہری سے پوچھ گچھ جاری ہے۔
پہلی کارروائی: افغان شہری کی برازیل روانگی ناکام
ایف آئی اے نے امرالدین حاکمی نامی افغان شہری کو آف لوڈ کردیا، جو قزاقستانی پاسپورٹ پر برازیل جا رہا تھا۔ امیگریشن چیکنگ کے دوران مسافر کی دستاویزات کو مشکوک پایا گیا، جس میں درج ذیل خامیاں سامنے آئیں:
پاسپورٹ پر امیگریشن کی انٹری اسٹیمپ موجود نہیں تھی۔
آئی بی ایم ایس ریکارڈ میں پاکستان آمد کا کوئی ریکارڈ موجود نہیں تھا۔
ابتدائی تفتیش میں مسافر نے انکشاف کیا کہ وہ طورخم بارڈر کے راستے غیر قانونی طور پر پاکستان میں داخل ہوا۔
سیکنڈ لائن آفس کے تجزیے میں پاسپورٹ پر ضروری سیکیورٹی فیچرز بھی غائب پائے گئے۔
ایف آئی اے نے ملزم کو گرفتار کرکے انسدادِ انسانی اسمگلنگ سرکل کراچی منتقل کر دیا، جہاں مزید تحقیقات جاری ہیں۔
دوسری کارروائی: سینیگال میں انسانی اسمگلنگ کا شکار مسافر سے تفتیش
ایف آئی اے نے ایک اور کارروائی میں محمد سعید نامی پاکستانی شہری کو حراست میں لے کر تفتیش کا آغاز کیا، جو سینیگال سے کراچی براستہ ایتھوپیا ایمرجنسی پاسپورٹ پر پہنچا تھا۔
ابتدائی تحقیقات کے مطابق، مسافر وزٹ ویزے پر سینیگال گیا اور وہاں چار ماہ گزارے۔
وہ نوید احمد عرف چوہدری تیمور نامی ایجنٹ سے رابطے میں تھا، جس نے 45 لاکھ روپے لے کر اسپین بھجوانے کی یقین دہانی کرائی۔
سینیگال پہنچنے پر ایجنٹ مرزا احسن نے مسافر سے پاسپورٹ چھین لیا اور اسے غیر قانونی طور پر سمندر کے راستے یورپ بھیجنے کی کوشش کی۔
ایف آئی اے نے مسافر کو مزید تفتیش اور ایجنٹوں کی نشاندہی کے لیے انسدادِ انسانی اسمگلنگ سرکل کراچی منتقل کر دیا ہے، جبکہ مزید گرفتاریاں متوقع ہیں۔
