وزیراعلیٰ سندھ سید مراد علی شاہ نے اچانک ڈپٹی کمشنر آفس کیماڑی کا دورہ کیا جہاں انہوں نے ایڈیشنل ڈی سی کے دفتر کا معائنہ کیا۔ وزیراعلیٰ سندھ نے دفتر میں آئے ہوئے لوگوں کے مسائل سنے اور کیماڑی کی ضلع انتظامیہ کو لوگوں کے مسائل حل کرنے کی ہدایت دی۔
وزیراعلیٰ سندھ سید مراد علی شاہ افسران کی غیر حاضری پر شدید برہم ہوئے۔ اس دوران انہیں آگاہ کیا گیا کہ ڈپٹی کمشنر کیماڑی کمشنر آفس میں اجلاس میں تھے۔ وزیراعلیٰ سندھ نے کمشنر کراچی کو ہدایت کی کہ اپنے ڈپٹی کمشنرز کے ساتھ اجلاس سیکنڈ شفٹ میں رکھا کریں اور تمام ڈپٹی کمشنرز کو صبح دفاتر میں لوگوں کے مسائل حل کرنے کی ہدایت دی۔
ڈپٹی کمشنر آفس کیماڑی میں اسسٹنٹ کمشنرز اور مختیار کار موجود نہیں تھے۔ وزیراعلیٰ سندھ نے اسسٹنٹ کمشنر ریوینیو نواز کلہوڑو کو معطل کرنے کی ہدایت کی اور اسسٹنٹ کمشنر ماڑی پور یاسین عباسی کو بھی دفتر میں نہ ہونے پر معطل کر دیا۔
وزیراعلیٰ سندھ نے کمشنر سے افسران کی غیر حاضری کی رپورٹ طلب کرلی۔
وزیراعلیٰ سندھ نے ڈپٹی کمشنر آفس کیماڑی کے ڈومیسائل دفتر کا بھی دورہ کیا جہاں انہوں نے لوگوں کے مسائل سنے اور ڈومیسائل بنانے کے عمل کی نگرانی کی۔
وزیراعلیٰ سندھ نے سب رجسٹرار آفس کا ریکارڈ چیک کیا اور سب رجسٹرار گڈاپ ٹو عبدالنبی لاشاری کو فوری ٹرانسفر کرنے کی ہدایت دی۔