تشکر نیوز: شاہ عبدالطیف بھٹائی کے عرس کی تقریبات کے دوران وزیر بلدیات سندھ سعید غنی، وزیر اوقاف سندھ ریاض شاہ شیرازی، اور صوبائی وزیر ثقافت و سیاحت سندھ سید ذوالفقار علی شاہ نے درگاہ حضرت شاہ عبدالطیف بھٹائی پر حاضری دی۔ وزراء نے درگاہ پر چادر چڑھائی اور دعا کی، اور شاہ عبدالطیف بھٹائی رح کے والد شاہ حبیب کی مزار پر بھی حاضری دی۔
جنرل ساحر شمشاد مرزا سے اولمپک گولڈ میڈلسٹ ارشد ندیم کی ملاقات، کامیابیوں پر خراج تحسین
وزیر بلدیات سندھ سعید غنی نے بھٹ شاہ میں میڈیا سے گفتگو کرتے ہوئے کہا کہ انہیں عرس کے موقع پر بھٹ شاہ آ کر خوشی ہوئی ہے۔ انہوں نے کہا کہ سندھ کی خوش نصیبی ہے کہ یہاں بڑے بڑے ہستیاں موجود ہیں اور شاہ عبدالطیف بھٹائی کا کلام محبت اور امن کا پیغام ہے۔ سعید غنی نے مزید کہا کہ شاہ بھٹائی کا پیغام سندھی زبان میں ہے اور اس کے تراجم دیگر زبانوں میں بھی ہوئے ہیں، اور ہمیں اس پیغام کو مزید پھیلانے کی ضرورت ہے۔
سعید غنی نے پیپلز پارٹی اور مخدوم خاندان کے تعلقات پر بھی روشنی ڈالی، انہوں نے کہا کہ پیپلز پارٹی ایک بڑی جماعت ہے اور مخدوم خاندان نے پارٹی کے قیام سے لے کر آج تک اس کا ساتھ دیا ہے۔ ان کا کہنا تھا کہ اگر کوئی ناراضگی ہے تو پارٹی اس مسئلے کو حل کرے گی کیونکہ یہ ہمارے گھر کا معاملہ ہے۔
انہوں نے پیپلز پارٹی کے اندر مختلف موقف رکھنے کی بات کرتے ہوئے کہا کہ قیادت ہمیں بات کرنے کی اجازت دیتی ہے اور مخدوم جمیل الزماں کے مسائل بھی حل کیے جائیں گے۔ امن و امان کی ذمہ داری صوبائی حکومت پر ہے اور پولیس امن و امان کے لیے کوشاں ہے۔ سعید غنی نے کہا کہ کسی کو سندھ پر قبضہ کرنے کی ضرورت نہیں ہے اور پاک رینجرز اور فوج ملک کی دفاعی فورسز ہیں جنہیں ضرورت پڑنے پر طلب کیا جا سکتا ہے، مگر سندھ میں ایسے حالات نہیں ہیں کہ فوج کو طلب کیا جائے۔
علاوہ ازیں، سعید غنی نے بتایا کہ حالیہ بارشوں کے بعد سکھر، لارکانہ، دادو اور دیگر شہروں میں پانی کی نکاسی کا عمل مکمل ہو چکا ہے، تاہم کچھ نشیبی علاقوں میں یہ کام ابھی جاری ہے۔
