وفاقی تحقیقاتی ادارے (ایف آئی اے) نے اسلام آباد ایئرپورٹ پر کارروائی کرتے ہوئے جعلی این جی او اور کاپ 31 ویزے کے مبینہ غلط استعمال کا معاملہ بے نقاب کردیا۔
ایف آئی اے امیگریشن نے ترکیہ جانے والے ایک مسافر کو پرواز نمبر QR-615 سے آف لوڈ کردیا۔ مسافر مشکوک سفری دستاویزات اور ویزے کے غلط استعمال کے شبہے میں روکا گیا۔
11 لاکھ 50 ہزار روپے میں ویزا حاصل کیا
ایف آئی اے کے مطابق امیگریشن کلیئرنس کے دوران مسافر کی پروفائلنگ کی گئی۔ افسران کو اس کی سفری دستاویزات اور سفر کے مقصد میں تضادات ملے۔
مسافر ترکیہ جانے کی تسلی بخش وجہ بھی پیش نہ کرسکا۔ اس کے بعد اسے مزید جانچ پڑتال کے لیے سیکنڈری پروفائلنگ میں بھیج دیا گیا۔
موبائل فونز اور سفری دستاویزات کی جانچ سے اہم انکشافات سامنے آئے۔ مسافر نے مبینہ طور پر ایک ایجنٹ سے 11 لاکھ 50 ہزار روپے میں این جی او / کاپ 31 ویزا حاصل کیا تھا۔
ایجنٹ نے اسے یقین دلایا تھا کہ اس ویزے پر ترکیہ میں ملازمت بھی کرسکتا ہے۔ تاہم یہ اجازت ویزے کی شرائط کے منافی تھی۔
واٹس ایپ چیٹس سے اہم شواہد مل گئے
تحقیقات کے مطابق مسافر HOPE این جی او کا رکن بھی نہیں تھا۔ واٹس ایپ چیٹس اور موبائل ڈیٹا کے تجزیے سے ایجنٹ کے ساتھ اس کے روابط سامنے آئے۔
ایف آئی اے کے مطابق شواہد سے ویزے کے مبینہ غلط استعمال کے منصوبے کا بھی پتا چلا۔
مزید یہ کہ ایجنٹ نے مسافر کو ڈیڑھ لاکھ روپے رشوت دینے کی ہدایت کی تھی۔ یہ رقم ایف آئی اے افسران کو امیگریشن کلیئرنس کے لیے پیش کی جانی تھی۔
مزید تحقیقات کے لیے اینٹی ہیومن ٹریفکنگ سرکل منتقل
ایف آئی اے نے مسافر کو پرواز سے آف لوڈ کرنے کے بعد اینٹی ہیومن ٹریفکنگ سرکل اسلام آباد منتقل کردیا۔ مزید قانونی کارروائی اور تفتیش جاری ہے۔
ایف آئی اے اسلام آباد زون نے جعلی ویزوں اور غیر قانونی امیگریشن کے خلاف کارروائیاں جاری رکھنے کے عزم کا اظہار کیا ہے۔
ادارے نے شہریوں کو ہدایت کی ہے کہ بیرون ملک سفر کے لیے مستند ذرائع سے ویزے حاصل کریں۔ غیر قانونی ایجنٹوں کے جھانسے میں آنے سے گریز کریں۔
