اسلام آباد: ایوانِ صدر میں تقسیمِ اعزازات کی ایک پروقار تقریب منعقد ہوئی، جس میں وزیر داخلہ سندھ ضیاءالحسن لنجار کو ان کی نمایاں خدمات کے اعتراف میں قومی اعزاز ستارۂ امتیاز سے نوازا گیا۔
کراچی میں سندھ پولیس اسپورٹس بورڈ اور میزان بینک کے درمیان معاہدہ، جدید پیڈل کورٹ کی تعمیر کا آغاز
تقریب میں صدرِ مملکت آصف علی زرداری نے وزیر داخلہ سندھ کو یہ اعلیٰ سول اعزاز پیش کیا۔ اس موقع پر اعلیٰ سول و عسکری حکام، قانون نافذ کرنے والے اداروں کے نمائندگان، سول سروس افسران اور مختلف شعبہ ہائے زندگی سے تعلق رکھنے والی اہم شخصیات نے شرکت کی۔
تفصیلات کے مطابق ضیاءالحسن لنجار کو سندھ میں امن و امان کے قیام، جرائم کی روک تھام، منشیات کے خلاف مؤثر کارروائیوں، پولیس نظام میں اصلاحات اور “ڈاکو راج” کے خاتمے کے لیے کیے گئے اقدامات کے اعتراف میں ستارۂ امتیاز دیا گیا۔
وزیر داخلہ کی قیادت میں صوبے میں سکیورٹی صورتحال بہتر بنانے اور منظم جرائم کے خلاف حکمت عملی کو مؤثر انداز میں نافذ کرنے کے اقدامات کو شرکاء نے سراہا اور اسے ایک قابلِ فخر پیش رفت قرار دیا۔
تقریب کے شرکاء نے کہا کہ ضیاءالحسن لنجار کی خدمات نہ صرف سندھ بلکہ قومی سطح پر بھی قابلِ تحسین ہیں، جبکہ ان کے اقدامات سے قانون نافذ کرنے والے اداروں کی کارکردگی میں نمایاں بہتری آئی ہے۔
اعزاز ملنے کے بعد سیاسی و سماجی حلقوں کی جانب سے وزیر داخلہ سندھ کو مبارکباد دی گئی اور نیک خواہشات کا اظہار کیا گیا۔