کراچی میں وزیراعلیٰ ہاؤس میں پیر 11 مئی 2026 کو سندھ اسمبلی کے اجلاس کے دوران ’معرکہ حق‘ کی قرارداد پیش کیے جانے کے بعد وزیراعلیٰ سندھ سید مراد علی شاہ نے تفصیلی خطاب کیا۔ انہوں نے کہا کہ یہ دن سندھ اور پاکستان کی سیاسی و قومی تاریخ میں ایک اہم سنگ میل کی حیثیت رکھتا ہے، جب پوری قوم نے ماضی کی طرح اتحاد اور یکجہتی کا مظاہرہ کیا اور آئندہ بھی اسی جذبے کے ساتھ کھڑی رہے گی۔
کراچی: ایس آئی یو کی بڑی کارروائی، آن لائن منشیات فروش نیٹ ورک بے نقاب، 2 ملزمان گرفتار، آئس برآمد
وزیراعلیٰ سندھ نے کہا کہ ایک سال قبل پاکستان کی عوام، افواج، سیاسی قیادت اور میڈیا نے مل کر دشمن کے عزائم کو ناکام بنایا۔ ان کے مطابق جب ملک پر دباؤ آیا تو پوری قوم نے متحد ہو کر بھرپور جواب دیا، جس سے پاکستان کی دفاعی صلاحیت مزید مضبوط ہوئی۔
انہوں نے کہا کہ پاکستان کے خلاف دشمن کے عزائم 1947 سے جاری ہیں اور مختلف ادوار میں جنگوں اور کشیدگی کے باوجود ملک نے ہمیشہ استقامت اور ثابت قدمی کا مظاہرہ کیا ہے۔ وزیراعلیٰ نے 1965 اور 1971 سمیت مختلف تاریخی مراحل کا حوالہ دیتے ہوئے کہا کہ پاکستان نے ہر دور میں اپنی دفاعی پوزیشن کو مضبوط کیا۔
اپنے خطاب میں انہوں نے پاکستان کے ایٹمی پروگرام کی تاریخ پر بھی تفصیل سے روشنی ڈالی اور کہا کہ اس کی بنیاد شہید ذوالفقار علی بھٹو نے رکھی، جسے بعد ازاں مختلف حکومتوں نے آگے بڑھایا، اور اسی تسلسل نے پاکستان کو ایک ایٹمی طاقت کے طور پر دنیا کے سامنے نمایاں کیا۔
وزیراعلیٰ سندھ نے خطے کی حالیہ کشیدگی کا ذکر کرتے ہوئے کہا کہ پاکستان نے ہمیشہ ذمہ دارانہ رویہ اپنایا اور ہر الزام پر شفاف تحقیقات کی پیشکش کی۔ ان کے مطابق فالس فلیگ آپریشنز کے ذریعے خطے میں کشیدگی پیدا کرنے کی کوششیں کی گئیں، تاہم پاکستان نے تحمل اور تدبر سے صورتحال کو سنبھالا۔
انہوں نے کہا کہ دفاعی اداروں نے ہر موقع پر پیشہ ورانہ مہارت کا مظاہرہ کرتے ہوئے دشمن کی کارروائیوں کو ناکام بنایا اور ملک کی خودمختاری کا بھرپور دفاع کیا۔
وزیراعلیٰ نے واضح کیا کہ پاکستان امن کا خواہاں ہے اور ہمیشہ مذاکرات و سفارتکاری پر یقین رکھتا ہے، تاہم قومی سلامتی اور دفاع پر کوئی سمجھوتہ نہیں کیا جا سکتا۔
آخر میں وزیراعلیٰ سندھ نے سندھ اسمبلی سے اپیل کی کہ ’معرکہ حق‘ کی قرارداد کو متفقہ طور پر منظور کیا جائے تاکہ قومی اتحاد، یکجہتی اور حب الوطنی کا پیغام مزید مضبوط ہو۔
انہوں نے کہا کہ پاکستان کی اصل طاقت اس کی قوم، افواج، نوجوان اور سیاسی اتحاد ہے، اور جب تک یہ اتحاد برقرار رہے گا، کوئی بھی ملک پاکستان کو نقصان نہیں پہنچا سکتا۔