بالی وڈ کی سینئر اداکارہ نیتو کپور نے اپنے شوہر رشی کپور کی وفات کے بعد شدید ذہنی اور جذباتی دباؤ سے گزرنے کا انکشاف کرتے ہوئے بتایا ہے کہ اس مشکل دور میں انہیں نیند کے لیے طبی مدد اور انجیکشنز کا سہارا لینا پڑا۔
وال اسٹریٹ جرنل کا انکشاف: عراق کے صحرائی علاقے میں اسرائیل کا خفیہ فوجی اڈہ، ایران کے خلاف کارروائیوں سے منسلک دعویٰ
ایک حالیہ انٹرویو میں نیتو کپور نے کہا کہ رشی کپور کے انتقال کے بعد وہ شدید صدمے میں چلی گئی تھیں اور ابتدا میں دوستوں نے انہیں تھراپی لینے کا مشورہ دیا، تاہم اس مرحلے پر وہ ذہنی طور پر اس کے لیے تیار نہیں تھیں۔
اداکارہ کے مطابق اس دوران انہوں نے ذہنی سکون حاصل کرنے اور نیند کی کمی کو پورا کرنے کے لیے شراب نوشی کا سہارا بھی لیا، تاہم جلد ہی انہیں احساس ہوا کہ وہ خود کو ایک مشکل کیفیت میں دھکیل رہی ہیں۔
نیتو کپور نے بتایا کہ بعد ازاں انہوں نے ڈاکٹر سے رابطہ کیا جس کے بعد ایک معالج روزانہ ان کے گھر آتے اور انہیں نیند کے لیے انجیکشن لگاتے تھے۔ یہ سلسلہ تقریباً 10 دن تک جاری رہا اور ڈاکٹر اس وقت تک ان کے ساتھ موجود رہتے جب تک وہ سو نہ جاتیں۔
ان کے مطابق اس مرحلے نے انہیں وقتی طور پر سکون ضرور دیا، تاہم اصل بحالی کا عمل وقت کے ساتھ شروع ہوا۔ نیتو کپور نے کہا کہ آہستہ آہستہ انہوں نے خود کو سنبھالا اور معمول کی زندگی کی طرف واپسی ممکن بنائی۔
اداکارہ نے مزید بتایا کہ فلموں میں دوبارہ واپسی نے ان کی زندگی میں اہم کردار ادا کیا۔ ان کے مطابق فلم “جگ جگ جیو” کی شوٹنگ کے دوران وہ ہر سین سے پہلے گھبراہٹ محسوس کرتی تھیں، تاہم کام نے انہیں ذہنی طور پر مضبوط ہونے میں مدد دی۔
نیتو کپور کے اس انکشاف کو مداحوں کی جانب سے جذباتی ردعمل اور ہمدردی کے ساتھ دیکھا جا رہا ہے۔