کراچی میں ٹریفک پولیس کی جانب سے ایک مشترکہ اسنیپ چیکنگ مہم جاری ہے، جس میں ضلعی پولیس اور اے وی ایل سی کے اہلکار بھی بھرپور حصہ لے رہے ہیں۔
ٹرمپ کی ایران پر حملوں کی دھمکی، پتھر کے زمانے کی بات
اس مہم کے دوران بغیر نمبر پلیٹ، نمبر پلیٹس چھپانے، یا غیر قانونی و فینسی نمبر پلیٹس استعمال کرنے والی گاڑیوں کے خلاف قانونی کارروائیاں کی جا رہی ہیں۔ متعدد گاڑیوں اور موٹر سائیکلوں کو ضبط کر کے متعلقہ تھانوں میں منتقل کیا گیا اور مالکان پر بھاری جرمانے بھی عائد کیے گئے ہیں۔
ٹریفک پولیس کا کہنا ہے کہ ضبط کی جانے والی گاڑیاں اور موٹر سائیکل مقررہ ضوابط کے مطابق نمبر پلیٹس نصب کرنے کے بعد مالکان کو واپس کی جائیں گی۔
مزید برآں، شہریوں کی سہولت کے لیے موقع پر لرننگ ڈرائیونگ لائسنس کے اجرا کا عمل بھی جاری رکھا گیا، تاکہ شہری بغیر رکاوٹ اپنے سفر کی قانونی تیاری کر سکیں۔
ٹریفک پولیس نے تمام شہریوں سے گزارش کی ہے کہ وہ ٹریفک قوانین کی مکمل پابندی کریں اور اپنی گاڑیوں پر واضح اور مستند نمبر پلیٹس کا استعمال یقینی بنائیں۔ بصورت دیگر، قانون کے مطابق سخت کارروائی کی جائے گی۔
کراچی ٹریفک پولیس نے زور دیا کہ شہری اپنے سفر میں قانون کے اصولوں پر عمل کریں تاکہ روڈ پر محفوظ اور ہموار ٹریفک کو یقینی بنایا جا سکے۔