صوبہ پنجاب میں میڈیکل اسٹورز پر جعلی اور غیرمعیاری ادویات کی فروخت کے انکشاف کے بعد Punjab Drug Control Board نے پانچ مختلف ادویات کے حوالے سے ہنگامی الرٹ جاری کر دیا ہے۔ حکام کے مطابق لیبارٹری ٹیسٹنگ کے دوران ادویات کے مخصوص بیچز جعلی یا غیرمعیاری قرار پائے ہیں۔
سینیٹ و قومی اسمبلی سے نیب ترمیمی بل منظور، اپوزیشن کا شدید احتجاج
رپورٹ کے مطابق ہڈیوں اور کیلشیم کے لیے استعمال ہونے والے مخصوص ملٹی وٹامنز کے بعض بیچز جعلی نکلے ہیں۔ حکام کا کہنا ہے کہ اسلام آباد کی ایک فارماسیوٹیکل کمپنی کے نام سے تیار کردہ یہ جعلی ملٹی وٹامنز مختلف میڈیکل اسٹورز پر فروخت ہو رہے تھے۔
مزید ٹیسٹنگ میں ایک معروف کھانسی کے سیرپ کو بھی غیرمعیاری اور ملاوٹ شدہ قرار دیا گیا، جبکہ درد کے علاج کے لیے استعمال ہونے والا ایک مخصوص انجیکشن بھی معیار پر پورا نہ اتر سکا۔ رپورٹ میں بتایا گیا ہے کہ مذکورہ انجیکشن میں غیر ضروری ذرات کی موجودگی پائی گئی، جو مریضوں کی صحت کے لیے خطرناک ثابت ہو سکتی ہے۔
ڈرگ کنٹرول بورڈ کے مطابق درد کا انجیکشن لاہور میں جبکہ کھانسی کا سیرپ کراچی میں تیار کیا گیا تھا۔ اس کے علاوہ جانوروں کے علاج کے لیے استعمال ہونے والے دو انجیکشنز بھی غیرمعیاری قرار دیے گئے ہیں کیونکہ ان میں اصل اجزا کی مقدار مقررہ معیار کے مطابق نہیں پائی گئی۔
رپورٹ میں مزید بتایا گیا ہے کہ جانوروں کے لیے تیار کی جانے والی یہ ادویات لاہور اور کراچی کی مختلف فارماسیوٹیکل کمپنیوں نے تیار کی تھیں۔
دوسری جانب Punjab Health Department نے فوری طور پر کارروائی کرتے ہوئے متعلقہ ادویات کو صوبے بھر کے میڈیکل اسٹورز سے واپس منگوانے کا حکم جاری کر دیا ہے تاکہ عوام کو ممکنہ نقصان سے بچایا جا سکے۔ حکام نے شہریوں اور فارماسسٹس کو ہدایت کی ہے کہ وہ مذکورہ بیچز کی فروخت فوری طور پر بند کر دیں اور متعلقہ حکام کو اطلاع دیں۔