مشرق وسطیٰ میں جاری جنگی صورتحال کے اثرات پاکستان کی معیشت پر بھی نمایاں ہونا شروع ہوگئے ہیں اور کاروباری ہفتے کے پہلے ہی روز پاکستان اسٹاک مارکیٹ شدید مندی کی لپیٹ میں آگئی۔ سرمایہ کاروں میں بے یقینی اور خوف کے باعث مارکیٹ کا آغاز ہی تاریخی منفی رجحان کے ساتھ ہوا۔
کویت میں امریکی طیارے تباہ، متضاد دعوے سامنے آگئے
کاروبار کے آغاز پر Pakistan Stock Exchange میں 100 انڈیکس 15 ہزار سے زائد پوائنٹس کی کمی کے ساتھ کھلا۔ ابتدائی لمحات میں 100 انڈیکس میں 15 ہزار 344 پوائنٹس کی نمایاں گراوٹ ریکارڈ کی گئی جس کے بعد انڈیکس 152,717 پوائنٹس کی سطح پر دیکھا گیا۔
ٹریڈنگ کے دوران مندی کا دباؤ برقرار رہا اور ایک موقع پر 100 انڈیکس 14 ہزار 882 پوائنٹس کمی کے ساتھ 153,179 پوائنٹس پر ٹریڈ کرتا رہا۔ ماہرین کے مطابق عالمی سطح پر بڑھتی ہوئی کشیدگی، خام تیل کی قیمتوں میں اتار چڑھاؤ اور سرمایہ کاروں کی محتاط حکمت عملی اس شدید مندی کی بڑی وجوہات ہیں۔
مارکیٹ میں 8 اعشاریہ 97 فیصد تک گراوٹ کے باعث سرکٹ بریکر کا اطلاق بھی کیا گیا، جس کے تحت کاروبار کو 45 منٹ کے لیے معطل کر دیا گیا۔ وقفے کے بعد ٹریڈنگ دوبارہ شروع کی گئی تاہم سرمایہ کاروں کا اعتماد بحال نہ ہوسکا۔
اسی طرح کے ایس سی 30 انڈیکس میں بھی 9 اعشاریہ 42 فیصد کی کمی ریکارڈ کی گئی جس پر قواعد کے مطابق کاروبار 45 منٹ کے لیے روک دیا گیا۔ ماہرین کا کہنا ہے کہ اگر خطے میں کشیدگی برقرار رہی تو مارکیٹ پر دباؤ مزید بڑھ سکتا ہے۔
مالیاتی تجزیہ کاروں کے مطابق موجودہ صورتحال میں سرمایہ کار محتاط رہیں اور طویل المدتی حکمت عملی اپنائیں کیونکہ عالمی سیاسی حالات کا اثر مقامی مارکیٹ پر براہ راست مرتب ہو رہا ہے۔